شمالی وزیرستان میں سکیورٹی فورسز کا آپریشن، 22 دہشت گرد ہلاک

راولپنڈی (ک م) پاکستان کے شورش زدہ صوبہ خیبرپختونخوا کے قبائلی ضلع شمالی وزیرستان کے علاقے شیوہ میں سکیورٹی فورسز نے کارروائی کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے 22 دہشت گردوں کو ہلاک کر دیا۔

پاکستانی فوج کے شعبہ تعلقات عامہ (آئی ایس پی آر) کے مطابق 17 مئی سے علاقے میں کلیئرنس اور سینیٹائزیشن آپریشن جاری ہے، جس کے دوران دہشت گردوں کے ٹھکانوں کو مؤثر طریقے سے نشانہ بنایا جا رہا ہے۔

بیان میں کہا گیا ہے کہ گزشتہ 24 گھنٹوں میں مارے گئے دہشت گرد متعدد کارروائیوں میں ملوث تھے اور ان سے اسلحہ اور بھاری مقدار میں گولہ بارود بھی برآمد ہوا ہے۔

آئی ایس پی آر کے مطابق دہشت گردوں نے مقامی آبادی کو دھمکیوں اور جبر کے ذریعے اپنے زیراثر رکھا اور بعض اوقات شہریوں کو انسانی ڈھال کے طور پر بھی استعمال کیا۔

سکیورٹی فورسز کے مطابق علاقے میں کلیئرنس آپریشن جاری ہے اور پورے علاقے کا محاصرہ کر کے سرچ کارروائیاں کی جا رہی ہے۔

پاکستان، کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کیلئے خوارج کی اصطلاح استعمال کرتا ہے۔