شمالی وزیرستان میں سیکیورٹی فورسز کا آپریشن، 3 دہشت گرد ہلاک

راولپنڈی (نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان میں سیکیورٹی فورسز نے خفیہ اطلاع پر کارروائی کر کے فائرنگ کے تبادلے کے بعد 3 دہشت گردوں کو ہلاک کردیا۔

پاکستانی فوج کے شعبہ تعلقات عامہ(آئی ایس پی آر) کے مطابق شمالی وزیرستان کے علاقے رزمک میں فورسز نے خفیہ اطلاع پر کارروائی کی۔

انٹیلی جنس پر مبنی آپریشن میں سیکیورٹی فورسز سے فائرنگ کے تبادلے میں 3 دہشت گرد ہلاک اور ایک زخمی ہو گیا۔

آئی ایس پی آر کے مطابق ہلاک ہونے والے خوارجی دہشت گردوں کے قبضے سے اسلحہ اور گولہ بارود برآمد کر لیا گیا۔

بیان میں کہا گیا کہ علاقے میں موجود مزید دہشت گردوں کو ختم کرنے کے لیے صفائی کی جا رہی ہے اور سیکیورٹی فورسز ملک سے خوارج اور دہشت گردی کی لعنت کو ختم کرنے کے لیے پرعزم ہیں۔

گزشتہ روز خیبر پختونخوا کے قبائلی ضلع کرم میں پاک فوج نے کارروائی کرتے ہوئے کالعدم ٹی ٹی پی کے 7 دہشت گردوں کو ہلاک کردیا تھا۔