شمالی وزیرستان میں سیکیورٹی فورسز کا آپریشن، 27 دہشت گرد ہلاک

راولپنڈی (ک م) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان کے علاقے میران شاہ میں سیکیورٹی فورسز کے انٹیلی جنس بیسڈ آپریشن کے دوران 27 دہشت گرد ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق یہ کارروائی دہشت گردوں کے ٹھکانوں کی موجودگی کی اطلاع پر کی گئی، جس میں فورسز نے مؤثر حکمت عملی کے تحت مختلف خفیہ ٹھکانوں کو نشانہ بنایا۔

آئی ایس پی آر کے مطابق آپریشن کے دوران 27 دہشت گرد ہلاک ہوئے جبکہ ان کے قبضے سے بھاری مقدار میں اسلحہ اور گولہ بارود بھی برآمد کیا گیا ہے۔

بیان میں کہا گیا ہے کہ کارروائی کے ذریعے دہشت گردوں کے نیٹ ورک کو بڑی حد تک کمزور کیا گیا ہے، اور علاقے میں ان کی سرگرمیوں کو ناکام بنایا گیا ہے۔

فوجی ترجمان کے مطابق یہ کارروائی حالیہ دنوں میں ملک سیف اللہ داوڑ کی ٹارگٹ کلنگ کے واقعے کے تناظر میں بھی اہم پیش رفت ہے، جس میں ملوث عناصر کو نشانہ بنایا گیا ہے۔

آئی ایس پی آر کا کہنا ہے کہ علاقے میں کلیئرنس آپریشن اور سینیٹائزیشن کا عمل جاری ہے تاکہ کسی بھی ممکنہ دہشت گرد موجودگی کا مکمل خاتمہ کیا جا سکے۔