شمالی وزیرستان میں چیک پوسٹ پر خودکش حملہ ناکام، 4 حملہ آور ہلاک

میرانشاہ (ڈیلی اردو رپورٹ) پاکستان کے شورش زدہ صوبہ خیبر پختونخوا کے قبائلی ضلع شمالی وزیرستان کے علاقے میرانشاہ کے قریب سکیورٹی فورسز نے ایک چیک پوسٹ پر خودکش حملے کی کوشش ناکام بناتے ہوئے بارود سے بھری گاڑی کو ہدف تک پہنچنے سے پہلے تباہ کر دیا، جبکہ بعد ازاں کارروائی کے دوران چار حملہ آور ہلاک ہو گئے۔

سکیورٹی ذرائع کے مطابق حملہ آور بارود سے بھری گاڑی کے ذریعے سکیورٹی چیک پوسٹ کو نشانہ بنانا چاہتے تھے، تاہم سکیورٹی فورسز پہلے سے ہائی الرٹ تھیں اور بروقت کارروائی کرتے ہوئے حملے کو ناکام بنا دیا۔

ذرائع کے مطابق حملے کے بعد علاقے میں سرچ اور کلیئرنس آپریشن شروع کیا گیا، جس کے دوران چار مبینہ حملہ آور مارے گئے، جبکہ مزید مشتبہ افراد کی تلاش کے لیے کارروائیاں جاری ہیں۔

مقامی ذرائع کا کہنا ہے کہ نظامیہ عیدک مارکیٹ سے تقریباً آدھا کلومیٹر دور میرانشاہ کی جانب اسلم پیکٹ کے مقام پر ہونے والا دھماکہ انتہائی شدید نوعیت کا تھا، جس کی آواز دو کلومیٹر تک سنی گئی۔

علاقہ مکینوں کے مطابق دھماکے کی شدت اس قدر زیادہ تھی کہ قریبی علاقوں میں گھروں کے دروازے کھل گئے جبکہ متعدد مقامات پر شیشے بھی ٹوٹ گئے۔

مقامی افراد نے بتایا کہ دھماکے کے بعد سکیورٹی فورسز کی جانب سے عوامی نقل و حرکت پر کسی قسم کی پابندی عائد نہیں کی گئی، جبکہ علاقے میں صورتحال معمول کے مطابق رہی۔

سکیورٹی ذرائع کے مطابق واقعے کے مختلف پہلوؤں سے تحقیقات جاری ہیں جبکہ علاقے میں سکیورٹی مزید سخت کر دی گئی ہے۔