شمالی وزیرستان میں کرفیو نافذ، تمام شاہراہیں بند

شمالی وزیرستان (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع شمالی وزیرستان میں سیکیورٹی خدشات کے پیش نظر کرفیو نافذ کر دیا گیا ہے، جس کے تحت 25 اور 26 اپریل کے دوران تمام شاہراہیں بند رہیں گی اور ہر قسم کی ٹریفک کی آمد و رفت معطل رہے گی۔

انتظامیہ کے مطابق یہ فیصلہ علاقے میں ممکنہ سیکیورٹی خطرات کے پیش نظر کیا گیا ہے تاکہ کسی بھی ناخوشگوار واقعے سے بچا جا سکے۔ 

کرفیو کے دوران ضلع کی تمام مرکزی اور ذیلی سڑکیں بند کر دی گئی ہیں۔

دوسری جانب علاقے میں ٹرک ڈرائیورز کے احتجاج کے باعث بجلی کی فراہمی تیسرے روز بھی معطل رہی، جس کے نتیجے میں شہریوں کو شدید مشکلات کا سامنا کرنا پڑ رہا ہے۔

مقامی ذرائع کے مطابق بجلی کی بندش اور آمد و رفت پر پابندی کے باعث معمولاتِ زندگی بری طرح متاثر ہوئے ہیں، جبکہ کاروباری سرگرمیاں بھی رک گئی ہیں۔

انتظامیہ کا کہنا ہے کہ صورتحال پر نظر رکھی جا رہی ہے اور سیکیورٹی خدشات کے خاتمے کے بعد ہی کرفیو میں نرمی کی جائے گی۔