شمالی، جنوبی وزیرستان اور اورکزئی میں فائرنگ، مذہبی عالم ہلاک، قبائلی ملک اغوا اور چیک پوسٹ نذر آتش

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی اضلاع شمالی وزیرستان، جنوبی وزیرستان اور اورکزئی میں فائرنگ، اغوا اور چیک پوسٹ کو نذر آتش کرنے کے تین الگ الگ واقعات پیش آئے ہیں۔

شمالی وزیرستان میں فائرنگ، مذہبی عالم اور بیٹا ہلاک

قبائلی ضلع شمالی وزیرستان کی تحصیل میران شاہ میں نامعلوم مسلح افراد نے بائی پاس روڈ پر ایک گاڑی پر فائرنگ کی، جس کے نتیجے میں مذہبی عالم مفتی فضل الرحمان اور ان کے کم عمر بیٹے نور الرحمان موقع پر ہی ہلاک ہو گئے۔ پولیس کے مطابق مفتی فضل الرحمان صوبائی علما ٹاسک فورس برائے انسداد پولیو کے رکن تھے۔

جنوبی وزیرستان میں قبائلی مشر اغوا

قبائلی ضلع جنوبی وزیرستان کے سب ڈویژن وانا میں شدت پسندوں نے قبائلی مشر ملک ہاشم کو اغوا کر لیا۔ پولیس کا کہنا ہے کہ وہ وانا بازار سے اپنی رہائش گاہ وچہ دانہ جا رہے تھے کہ راستے میں نامعلوم مسلح افراد نے زبردستی گاڑی سے اتار کر اپنے ساتھ لے گئے۔

 مقامی ذرائع کے مطابق ملک ہاشم کا تعلق ایک بڑے قبیلے سے ہے۔ واقعے پر اہل علاقہ نے شدید غم و غصے کا اظہار کرتے ہوئے حکومت اور انتظامیہ سے فوری بازیابی کا مطالبہ کیا۔ خاندانی ذرائع کا کہنا ہے کہ تلاش جاری ہے، تاہم اب تک کوئی سراغ نہیں ملا۔

اورکزئی میں چیک پوسٹ نذر آتش

قبائلی ضلع اورکزئی کے اپر علاقے یخ کنڈاو میں نامعلوم شدت پسندوں نے پولیس اور سیکیورٹی فورسز کی مشترکہ "خالہ چیک پوسٹ" کو نذر آتش کر دیا۔ پولیس کے مطابق یہ چیک پوسٹ حساس نوعیت کی تھی، تاہم واقعے کے وقت خالی تھی۔