شیسپر گلیشئر کے سرکنے کا عمل تیز؛ ہنزہ میں سیلاب کا خطرہ

گلگت (ویب ڈیسک) شیسپر گلیشئر کے سرکنے کا عمل تیز ہو گیا جس کے باعث گرمیوں میں ہنزہ میں سیلاب کا خدشہ ہے۔

ڈائریکٹر گلگت بلتستان ڈیزاسٹر منیجمنٹ اتھارٹی فرید احمد کا کہنا ہے کہ شیسپر گلیشئر 3 ماہ کے دوران 1600 میٹر تک سرک چکی ہے، گلیشئر سرکنے سے پانی کا بہاؤ رک گیا جس سے مصنوعی جھیل بن گئی ہے۔

انہوں نے مزید بتایا کہ پانی کا بہاؤ رکنے کی وجہ سے 2 بجلی گھروں کو بھی بند کیا گیا ہے۔

ان کا کہنا ہے کہ شیسپر گلیشئر سرکنے کے باعث گرمیوں میں جھیل سے پانی کے اخراج سے سیلاب کا امکان ہے۔

فرید احمد کا کہنا ہے کہ گلیشئر کے تیزی کے سرکنے کی صورت میں آبادی کو خطرہ ہو سکتا ہے۔

ان کا کہنا تھا کہ جی بی ڈی ایم اے نے انتہائی خطرے سے نمٹنے کے لیے تیاری مکمل کر لی ہے اور آبادی کو گلیشئر اور ممکنہ سیلاب سے بچاؤ کے لیے بند بنانے کا کام شروع کر دیا گیا ہے۔

ڈائریکٹر جی بی ڈی ایم اے کا کہنا ہے کہ آبادی کے لیے متبادل روڈ کی مرمت اور پُل کا انتظام کیا گیا ہے، کسی بھی خطرے کے پیش نظر خوراک کا ذخیرہ بھی کیا جا رہا ہے۔