صدارتی ایوارڈ یافتہ پشتو شاعر افگار بخاری سپرد خاک، تحریک طالبان نے ذمہ داری قبول کرلی

ڈی آئی خان (توقیر حسین زیدی) لکی مروت میں پشتو کے معروف و صدراتی ایوارڈ یافتہ شاعر سید ظہور عباس بخاری المعروف افگار بخاری کی نماز جنازہ ادا کر دی گئی۔

تفصیلات کے مطابق گزشتہ روز خیبر پختونخوا کے ضلع لکی مروت میں شہید ہونے والے پشتو کے معروف اور صدارتی ایوارڈ یافتہ شاعر ظہور عباس بخاری المعروف افگار بخاری کی نماز جنازہ ادا کر دی گئی۔ شہید افگار بخاری کے جسد خاکی کو نماز جنازہ کے بعد انکے آبائی قبرستان شاہ بخاری میں سپرد خاک کیا گیا۔

اس موقع پر سیکیورٹی کے سخت انتظامات کئے گئے تھے۔

جنازہ میں ڈپٹی کمشنر جہانگیر اعظم، تحریک فقہ جعفریہ کے مرکزی صدر علامہ رمضان توقیر، صوبائی صدر حمید حسین امامی اور بڑی تعداد میں شاعروں، ادیبوں کے علاوہ مختلف شعبہ ہائے زندگی سے تعلق رکھنے والے افراد سمیت شہدا کے ورثا اور عمائدین شہر نے بڑی تعداد میں شرکت کی۔ نماز جنازہ میں کوئی عوامی نمائندہ موجود نہیں تھا۔

سید ظہور عباس بخاری المعروف افگار بخاری کو گزشتہ روز دہشت گردوں نے ان کے حجرے میں گھس اندھادھند فائرنگ کرکے شہید کر دیا تھا۔ وہ لکی مروت امام بارگاہ کے متولی تھے۔

افگار بخاری کا اصل نام سید ظہور عباس شاہ تھا اور انکا شمار پشتو زبان کے مشہور شاعروں میں ہوتا تھا۔ شہید افگار بخاری پشتو ادب میں نمایاں خدمات پر صدارتی ایوارڈ بھی حاصل کر چکے تھے۔

یاد رہے کہ سال 2012 میں بھی ان پر قاتلانہ حملہ ہوا تھا جس میں وہ معجزاتی طور پر بچ گئے تھے۔ جبکہ فروری 2018 کو بھی انکے گھر پر دہشت گردوں نے حملہ کیا تھا۔

دوسری جانب افگار بخاری کے قتل کی ذمہ داری کالعدم تنظیم تحریک طالبان پاکستان کے قاری حسین گروپ نے قبول کرلی۔