صوابی: پاک فضائیہ کا تربیتی طیارہ گرکر تباہ ہوگیا

صوابی (ڈیلی اردو) صوبہ خیبرپختونخوا کے ضلع صوابی میں پاک فضائیہ کا ٹرینی طیارہ حادثے کا شکار ہوگیا ہے، تاہم، دونوں پائلٹ محفوظ رہے۔

میڈیا رپورٹس کے مطابق ریسکیو 1122 کے حکام نے بتایا کہ منگل کو خیبر پختونخوا کے ضلع صوابی میں گدون امازئی کے پہاڑی علاقے میں پاک فضائیہ کا تربیتی طیارہ گر کر تباہ ہو گیا۔

ریسکیو 1122 کے اہلکار لقمان خان نے ڈان سے بات کرتے ہوئے بتایا کہ ’حالانکہ تربیتی طیارہ تباہ ہو گیا، لیکن دونوں پائلٹ کامیابی سے اپنے پیراشوٹ کے ذریعے باہر نکلے اور صرف معمولی زخموں کے ساتھ بحفاظت لینڈ کر گئے۔‘

انہوں نے کہا کہ ریسکیو آپریشن کے ابتدائی مرحلے میں مقامی لوگوں نے دونوں پائلٹوں کی مدد کی۔

سوشل میڈیا پر وائرل ہونے والی ویڈیو میں ایک مقامی شہری نے بتایا کہ دونوں پائلٹ اس واقعے کی وجہ سے خوفزدہ نظر آئے اور انہیں فوری طور پر محفوظ مقام پر لے جایا گیا۔