صومالیہ میں امریکی فوجی کا اسپیشل آپریشن، داعش کا سینیئر رہنما بلال السوڈانی ہلاک

واشنگٹن (ڈیلی اردو/اے ایف پی/رائٹرز) پینٹاگون کا کہنا ہے کہ اسلامک اسٹیٹ کے اہم سرغنہ بلال السوڈانی ایک خصوصی فوجی آپریشن میں ہلاک ہو گئے۔ حکام کے مطابق وہ داعش کی توسیع میں ایک ‘اہم سہولت کار’ تھے۔

امریکی محکمہ دفاع پینٹاگون کے حکام نے جمعرات کے روز اعلان کیا کہ امریکہ کی اسپیشل آپریشنز فورسز نے صومالیہ کے ایک دور دراز علاقے میں نام نہاد اسلامی دہشت گرد گروپ ‘اسلامک اسٹیٹ’ (داعش) سے وابستہ ایک سینیئر شخصیت بلال السوڈانی کو ہلاک کر دیا۔

The U.S. military conducted a successful counterterrorism operation in Somalia. https://t.co/F6MCDYLqwP pic.twitter.com/HHIW8VC3nZ

— U.S. Africa Command (AFRICOM) (@USAfricaCommand) January 26, 2023

امریکی وزیر دفاع لائیڈ آسٹن نے بتایا کہ صومالیہ میں آئی ایس کے علاقائی رہنما بلال السوڈانی اس گروپ کے عالمی نیٹ ورک کے لیے بھی ایک ”اہم سہولت کار” تھے۔

آسٹن نے ایک بیان میں کہا، ”یہ کارروائی امریکہ اور اس کے شراکت داروں کو مزید تحفظ فراہم کرتی ہے اور یہ امریکیوں کو اندرون ملک اور بیرون ملک دہشت گردی کے خطرے سے بچانے کے لیے ہماری ثابت قدمی اور عزم کی بھی عکاس ہے۔”

ہمیں اس آپریشن کے بارے میں مزید کیا معلوم ہے؟

امریکی وزیر دفاع نے بتایا کہ صدر جو بائیڈن نے اس آپریشن کا حکم دیا تھا، جو بدھ کے روز انجام دیا گیا تھا۔

امریکی حکام کے مطابق بلال السوڈانی اور داعش کے دیگر دس جنگجو اس وقت گولی باری میں ہلاک ہوئے جب امریکی افواج کا ایک خصوصی دستہ انہیں پکڑنے کے لیے پہاڑ کے غار کے کمپلیکس میں اترا۔

آسٹن نے مزید کہا کہ اس آپریشن میں کوئی شہری زخمی یا ہلاک نہیں ہوا۔ خبر رساں ادارے ایسوسی ایٹیڈ پریس نے ایک امریکی اہلکار کے حوالے سے بتایا کہ چھاپے کی اس کارروائی میں شامل ایک امریکی فوجی کتے کے کاٹنے سے زخمی ہو گیا۔

بلال السوڈانی کون تھے؟

میڈیا رپورٹس میں امریکی حکام کے حوالے سے کہا گیا ہے کہ السوڈانی نام نہاد اسلامی شدت پسند تنظیم اسلامک اسٹیٹ میں شامل ہونے سے قبل القاعدہ سے منسلک گروپ الشباب کے لیے جنگجوؤں کو بھرتی اور انہیں تربیت دینے کا کام کیا کرتے تھے۔

اطلاعات کے مطابق وہ افریقہ میں آئی ایس کی کارروائیوں میں ملوٹ ہونے کے ساتھ ہی افغانستان میں سرگرم اسی کی ایک شاخ اسلامک اسٹیٹ خراسان (آئی ایس کے) کے لیے مالی تعاون بھی فراہم کرنے میں ملوث تھے۔

آسٹن نے کہا السوڈانی افریقہ اور افغانستان میں داعش کی بڑھتی ہوئی موجودگی کو فروغ دینے کے ساتھ ہی عالمی سطح پر بھی اس گروپ کی کارروائیوں میں مالی اعانت کے ذمہ دار تھے۔