ضلع کرم کے امن کیلئے ضروری ہے کہ بالیش خیل کا مسئلہ فوری طور پر حل کیا جائے: طوری بنگش قبائل

پاراچنار (محمد صادق) حکومت بالیش خیل کے شاملات کا مسئلہ حل کرنے میں دلچسپی نہیں لی رہی ہے اگر حکومت نے بالیش خیل کا مسئلہ حل نہ کیا تو ضلع کرم کے تمام اقوام اور قبائل بالیش خیل کا مسئلہ از خود حل کرنے کیلئے مجبور ہوجائیں گے۔

ان خیالات کا اظہار سابق سینیٹر علامہ سید عابد حسین الحسینی، ملک محمد حسن، علامہ یوسف حسین، سید مشیر حسین اور علامہ مزمل حسین نے لوئر کرم بالیش خیل میں طوری بنگش اقوام کے ایک بڑے اجتماع سے خطاب کرتے ہوئے کیا۔

انہوں نے حکومت اور دیگر ذمہ دار حکام سے مطالبہ کیا کہ بالیش خیل شاملات پر مخالف قبائل کی آباد کاری فوری طور پر روک دی جائے اور ضلع کرم کے تمام قبائل کا آپس میں شاملاتی رقبوں کے تنازعات کے فیصلے کاغذات مال کے مطابق کئے جائیں اور ضلع کرم کے امن کے لئے ضروری ہے کہ بالیش خیل کا مسئلہ فوری طور پر حل کیا جائے۔

انہوں نے کہا کہ کہ سابق پولٹیکل ایجنٹ بصیر خان نے 460 مکانات مسمار کردئیے تھے اسی طرح ریونیو ریکارڈ کے مطابق تمام ناجائز قابضین کے گھر مسمار کئے جائیں۔ ہم بارہا واضح کرچکے ہیں کہ شرعی طور پر اور رواج کے مطابق ایک فیصلے پر دوسرا فیصلہ نہیں کیا جاسکتا ہے۔

علامہ عابد حسین الحسینی نے کہا کہ اگر ضلع کرم میں جہاں جہاں بھی کوئی کاغذات مال سے اپنا حق ثابت کرے ان کو حق ملنا چاہئے، اسلام کسی کو پرائی زمین غضب کرنے کی قطعی اجازت نہیں دیتا۔ انہوں نے اس امر پر افسوس کا اظہار کیا کہ ہمارے شاملات پر دھڑا دھڑ آباد کاری کرنے والوں سے شازش کے تحت چشم پوشی ہورہی ہے۔

انہوں نے کہا کہ اگر حکومت نے بالیش خیل قوم کو انصاف فراہم نہیں کیا تو ضلع کرم کے طوری بنگش قبائل انتہائی قدم اٹھانے پر حق بجانب ہونگے۔ مقررین نے وزیراعظم عمران خان، گورنر اور وزیر اعلی خیبر پختونخوا سے اس سلسلے میں مداخلت کی اپیل کرتے ہوئے انصاف کی فراہمی کامطالبہ کیا۔