طالبان حکومت کا نیا حکم:مشہور گیم ٹیبل فٹبال غیر شرعی ، گیمنگ حرام

کابل(ڈیلی اردو) افغانستان میں طالبان حکومت نے تفریحی سرگرمیوں پر نئی قدغنیں عائد کرتے ہوئے ویڈیو گیمز اور ٹیبل فٹبال (فوسبال) جیسے مقبول کھیلوں پر مکمل پابندی لگا دی ہے۔ طالبان کا مؤقف ہے کہ یہ کھیل نوجوان نسل کو دینی تعلیمات سے دور کرتے ہیں اور شریعت کے خلاف ہیں۔

مقامی اطلاعات کے مطابق طالبان حکام نے ہرات، بلخ، دایکندی اور دیگر کئی علاقوں میں درجنوں گیمنگ سینٹرز بند کروا دیے ہیں۔ ان سرگرمیوں کو “دینی ذمہ داریوں سے غفلت کا سبب” قرار دیتے ہوئے سخت مؤقف اختیار کیا گیا ہے۔ بعض مذہبی رہنماؤں نے ٹیبل فٹبال میں استعمال ہونے والے چھوٹے کھلاڑیوں کے مجسموں کو “غیر شرعی” قرار دیتے ہوئے ان کی موجودگی کو “بت پرستی کے مترادف” قرار دیا۔

ٹیبل فٹبال افغانستان کے تعلیمی اداروں میں خاصی مقبول تفریح تھی، جس پر اچانک پابندی نے سینٹر مالکان کو مالی نقصان سے دوچار کر دیا ہے۔ کئی متاثرہ افراد نے طالبان کی وزارتِ امر بالمعروف و نہی عن المنکر سے پابندی اٹھانے کی اپیل کی، مگر جواب میں انہیں کہا گیا کہ وہ “کسی اور پیشے کی تلاش کریں”۔

یہ اقدامات طالبان کی جانب سے کھیلوں اور تفریح پر عائد کی جانے والی مسلسل پابندیوں کا تسلسل ہیں۔ اس سے قبل بھی شطرنج کو جوئے سے منسلک ہونے کی بنیاد پر ممنوع قرار دیا جا چکا ہے، بلیئرڈ کو وقت کا ضیاع کہتے ہوئے بند کر دیا گیا، اور شیشہ کیفے بھی اخلاقی خرابی اور مخلوط ماحول کے الزامات کی بنیاد پر بند کیے جا چکے ہیں۔

طالبان حکومت کے ان اقدامات پر عوامی سطح پر ملے جلے ردعمل کا اظہار کیا جا رہا ہے۔ کچھ حلقے انہیں مذہبی اصولوں کا تحفظ قرار دے رہے ہیں، تو کچھ افراد انہیں نوجوانوں کی تفریحی آزادیوں پر غیر ضروری قدغن سمجھتے ہیں۔