عراق: صدام حسین کے سابق اعلیٰ فوجی افسر سعدون القیسی کو پھانسی پر لٹکا دیا گیا

بغداد (ڈیلی اردو) عراقی حکومت نے سابق صدر صدام حسین کے ساتھی اور میجر جنرل سعدون صبری جمیل القیسی کو پھانسی دے دی۔

عرب میڈیا کے مطابق سعدون القیسی صدام حسین کے دور میں میجر جنرل کے عہدے پر فائز تھے اور انہیں گزشتہ سال گرفتار کیا گیا تھا۔ 

عراقی حکام کا کہنا ہے کہ القیسی انسانیت سوز جرائم میں ملوث پائے گئے۔ ان پر الزام تھا کہ وہ 1980 میں ممتاز عراقی عالم محمد باقر الصدر اور ان کی بہن بنت الہدٰی کے ہلاک ہونے میں شریک تھے۔

اس کے علاوہ القیسی پر دیگر عام شہریوں کے ہلاک ہونے میں بھی ملوث ہونے کے الزامات تھے۔ عرب میڈیا کے مطابق عراقی حکام نے بتایا کہ القیسی کو منصفانہ عدالتی کارروائی کے بعد پیر کو پھانسی دی گئی۔

سعدون القیسی 2003 میں صدام حسین کی حکومت کے خاتمے کے بعد شام فرار ہو گئے تھے، لیکن فروری 2023 میں وہ عراق کے شہر اربیل پہنچے جہاں انہیں گرفتار کر لیا گیا۔

القیسی صدام کے دور میں اعلیٰ عہدوں پر فائز رہے، جن میں ریاستی سلامتی کے ڈائریکٹر اور ساحلی شہر بصرہ اور نجف میں ڈائریکٹر آف سکیورٹی کے عہدے شامل ہیں۔