عراق: قانونی ترمیم کیخلاف یزیدی رکن پارلیمنٹ کا احتجاج، مذاہب کو "طوائف" قرار دینے کی کوشش مسترد

بغداد (ڈیلی اردو)  یزیدی (ایزدی) رکن پارلیمنٹ فیان دخیل نے پیر کے روز مسیحی، یزیدی  اور صابئہ مندائی مذاہب کے اوقاف سے متعلق قانون میں مجوزہ ترمیم پر شدید تنقید کرتے ہوئے اسے "ادیان" کے بجائے "طوائف" قرار دینے کی کوشش کو مسترد کر دیا اور واضح کیا کہ اس ترمیم کو کسی صورت منظور نہیں ہونے دیا جائے گا۔

اپنے بیان میں فیان دخیل نے کہا کہ ’’بعض چرچ رہنماؤں نے آئین کی صریح خلاف ورزی کرتے ہوئے قانون میں ایسی ترمیم پیش کی ہے جس کے ذریعے مسیحی، یزیدی (ایزدی) اور صابئہ مندائی مذاہب کو محض طوائف قرار دیا جا رہا ہے، حالانکہ یہ ادیان اپنی حیثیت میں مکمل ہیں۔ ہم اپنے وجود کو طوائف کی اصطلاح میں محدود کیے جانے کو کسی طور قبول نہیں کریں گے۔‘‘

انہوں نے کہا کہ ’’یزیدی آبادی کی تعداد مسیحیوں سے کہیں زیادہ ہے، اس کے باوجود اس متنازعہ مسودے کو صدرِ مملکت کو بھیجا گیا ہے، جنہوں نے تاحال اس پر کوئی مؤقف اختیار نہیں کیا اور نہ ہی اس کی آئین سے متصادم شقوں کو رد کیا ہے۔‘‘

فیان دخیل نے مزید بتایا کہ ’’اس تجویز میں یہ بھی شامل ہے کہ ’یہودی طائفہ‘ کو تسلیم کیا جائے، حالانکہ عراق میں ان کی موجودگی صفر کے برابر ہے، جبکہ یزیدی  اور صابئہ مندائی آبادی لاکھوں میں ہے۔‘‘

انہوں نے سوال اٹھایا کہ ’’ایک مستحکم قانون میں ایسی ترمیم کی آخر کیا ضرورت ہے جس کے ذریعے کچھ شقیں شامل یا حذف کر کے کابینہ کو اختیار دیا جائے کہ وہ کسی بھی مذہب یا گروہ کو محض ایک انتظامی فیصلے کے تحت ختم کر دے؟ یہ بات شدید تشویش پیدا کرتی ہے اور ہم کسی صورت اس بل کو پاس نہیں ہونے دیں گے۔‘‘

یزیدی (ایزدی) کرد نسل سے تعلق رکھنے والا ایک مذہبی گروہ ہے جس کی اکثریت صوبہ نینویٰ اور اقلیم کردستان میں مقیم ہے، جبکہ صابئہ مندائی ایک قدیم مذہب ہے جس کی جڑیں وادی الرافدین سے جڑی ہیں اور اس کے ماننے والے بنیادی طور پر جنوبی عراق خصوصاً دجلہ و فرات کے کناروں اور دلدلی علاقوں (اہوار) میں رہائش پذیر ہیں۔