عراق میں دھماکا ، 2 فوجی ہلاک، 3 زخمی

بغداد (ڈیلی اردو) عراق کے ضلع مخمور میں ایک دھماکے نتیجے میں دو فوجی ہلاک جبکہ تین زخمی ہوگئے۔

غیر ملکی خبر رساں ادارے کے مطابق جمعرات کو عراق کے شمالی ضلع مخمور میں فوجی اہلکار ایک گاڑی میں سفر کررہے تھے کہ اس دوران دھماکہ خیز مواد پھٹ گیا جس کے نتیجے میں گاڑی میں سوار دو فوجی ہلاک جبکہ تین زخمی ہوئے۔

رپورٹس کے مطابق دھماکے کی ذمہ داری کسی تنظیم یا گروپ نے قبول نہیں کی تاہم کہا جاتا ہے کہ داعش کے عسکریت پسند اس علاقہ میں سرگرم ہیں اور ایسی دہشتگردانہ کارروائیاں کرتے رہتے ہیں۔

واضح رہے کہ گزشتہ پیر کو عراقی شہر فلوجہ کے شمال مغرب میں البو بالی گاؤں پر مسلح افراد کے حملے میں آٹھ افراد ہلاک اور تین زخمی ہو گئے تھے۔