عراق: کرکوک میں امریکی فوجی اڈے پر راکٹ حملہ

بغداد (ڈیلی اردو) عراق کے صوبے کرکوک میں ایک فوجی اڈے پر ‘کاتیوشا’ راکٹ سے حملہ کیا گیا ہے۔ اس فوجی اڈے پر امریکی فوج بھی تعینات ہے۔

ذرائع نے بتایا کہ ‘کی وان’ فوجی اڈے پر جہاں راکٹ گرا ہے عراق کی فیڈرل پولیس کے بریگیڈ چھ کا ہیڈ کواٹر بھی موجود ہے جب کہ اسپیشل فورس کے بریگیڈ 16 اور کرکوک میں انسداد دہشت گرد فورس کا بھی ہیڈ کواٹر موجود ہے۔

اڈے پر راکٹ حملے کے وقت موسم خراب ہونے کے باوجود امریکی فوج کے جنگی طیاروں کو نچلی پروازوں کے ساتھ اڑانیں بھرتے دیکھا گیا ہے۔

خیال رہے کہ 27 دسمبر 2019ء کو عراق میں قائم “K1″‘امریکی فوجی اڈے پر ہونے والے راکٹ حملے میں ایک امریکی ٹھیکیدار ہلاک ہوگیا تھا۔ امریکا نے اس حملے کا الزام حزب اللہ ملیشیا پر عاید کیا تھا۔

اس واقعے کے بعد چند ایام کے بعد امریکی فوج نے عراق میں متعدد مقامات پر بمباری کر کے الحشد ملیشیا کے 25 اہلکارروں کو شہید کیے گئے تھے۔ امریکی فوج کی کارروائی کے بعد الحشد کے حامیوں‌ نے عراق میں امریکی سفارت خانے پر دھاوا بول دیاتھا۔ انہی ایام میں امریکی فوج نے عراق میں ایرانی پاسداران انقلاب کی سمندر پار آپریشنل کارروائیوں میں سرگرم القدس ملیشیا کے سربراہ کمانڈر قاسم سلیمانی کو بغداد ہوائی اڈے کے قریب شہید کردیا تھا۔ 3 جنوری کو ہونے والے اس آپریشن میں الحشد ملیشیا کے دو کمانڈروں اور قاسم سلیمانی سمیت 5 کمانڈر شہید ہوگئے تھے۔

اس کارروائی کے انتقام میں ایران نے 8 جنوری کو عراق میں دو امریکی فوجی اڈوں‌ پر میزائل حملے کیے تھے جن میں 109 امریکی فوجیوں‌ کے زخمی ہونے کی تصدیق کی گئی ہے۔