عراقی خفیہ ادارے کا دعویٰ، داعش سے تعلق کے الزام میں 47 فرانسیسی شہری عراق منتقل

بغداد (ڈیلی اردو)عرب میڈیا کے مطابق عراقی انٹیلی جنس ادارے نے دعویٰ کیا ہے کہ شمال مشرقی شام سے 47 فرانسیسی شہریوں کو عراق منتقل کیا گیا ہے، جن پر شدت پسند تنظیم داعش سے تعلق رکھنے کا الزام ہے۔

عراقی خفیہ ادارے نے اپنے بیان میں کہا کہ بعض میڈیا رپورٹس میں ان افراد کی منتقلی کی خبر دی گئی تھی، اور تحقیقات کے بعد یہ بات سامنے آئی کہ وہ مبینہ طور پر داعش سے وابستہ ہیں۔ ادارے کے مطابق ان پر الزام ہے کہ انہوں نے 2014 سے 2017 کے دوران عراق میں دہشت گرد کارروائیوں میں کردار ادا کیا یا پھر ایسے اقدامات کیے جو ملک کی سلامتی کے لیے خطرہ تھے۔

مزید کہا گیا کہ ان افراد کو عدالتی احکامات اور انٹیلی جنس تحقیقات کی بنیاد پر عراق منتقل کیا گیا ہے، جہاں ان پر عراقی قوانین کے تحت مقدمات چلائے جائیں گے۔

امریکی خبر رساں ادارے "ایسوشی ایٹڈ پریس" نے بھی ایک روز قبل رپورٹ دی تھی کہ عراق نے شمال مشرقی شام سے 47 فرانسیسی شہریوں کو تحویل میں لیا ہے، جن پر داعش سے وابستگی کا شک ہے۔

رپورٹ کے مطابق یہ افراد شام کے ان حراستی مراکز میں موجود تھے جہاں تقریباً 9 ہزار مبینہ داعش جنگجو قید ہیں اور جن کی نگرانی کرد فورسز (قسد) امریکی حمایت سے کر رہی ہیں۔ تین عراقی سکیورٹی حکام نے بتایا کہ ان فرانسیسیوں کو تقریباً ڈیڑھ ماہ قبل عراق کے حوالے کیا گیا تھا، تاہم اس وقت اس کارروائی کا باضابطہ اعلان نہیں کیا گیا۔