غزہ میں اسرائیلی فضائی حملوں میں حماس کمانڈر سمیت 10 افراد ہلاک

غزہ (ڈیلی اردو)غزہ میں اسرائیلی فوج کے فضائی حملوں میں حماس کے عسکری ونگ کے سینئر کمانڈر سمیت 10 افراد ہلاک ہو گئے ہیں۔ حماس نے دعویٰ کیا ہے کہ یہ حملے جمعرات کو وسطی غزہ کے دیر البلح علاقے میں کیے گئے۔

حماس کے مطابق ہلاک ہونے والوں میں محمد الحولی شامل ہیں، جو دیر البلح میں حماس کے عسکری ونگ کے کمانڈر تھے۔

مقامی ذرائع کے مطابق اسلامی جہاد کے عسکری ونگ ’القدس بریگیڈز‘ کے کمانڈر اشرف الخطیب بھی ان ہلاکتوں میں شامل ہیں۔

اسرائیلی فوج نے اس واقعے پر تاحال کوئی بیان جاری نہیں کیا۔

حماس نے الحولی خاندان کے گھر پر حملے کی شدید مذمت کی اور اسے جنگ بندی معاہدے کی کھلی خلاف ورزی قرار دیا۔

حماس کا کہنا ہے کہ اسرائیل معاہدے کی پاسداری نہیں کر رہا بلکہ اسے کمزور کر کے غزہ کے عوام کے خلاف جنگ دوبارہ شروع کرنا چاہتا ہے۔

فلسطینی محکمہ صحت کے مطابق ہلاک ہونے والوں میں ایک 16 سالہ لڑکا بھی شامل ہے۔

رپورٹس کے مطابق گزشتہ اکتوبر سے نافذ جنگ بندی کے بعد اب تک 400 سے زائد فلسطینی اور تین اسرائیلی فوجی ہلاک ہو چکے ہیں۔ اسرائیل نے غزہ کے نصف سے زیادہ علاقے میں عمارتیں مسمار کر کے لوگوں کو بے گھر کر دیا ہے، جہاں اب 20 لاکھ سے زائد افراد عارضی پناہ گاہوں یا تباہ شدہ عمارتوں میں رہنے پر مجبور ہیں۔

یونیسف نے منگل کو بتایا کہ جنگ بندی کے بعد سے غزہ میں 100 سے زیادہ بچے ہلاک ہو چکے ہیں، جن میں سے بعض ڈرون حملوں کا نشانہ بنے۔