فلسطین کے حق میں مظاہرے پر برطانوی حکومت کی پابندی

لندن (ڈیلی اردو) لندن کی میٹروپولیٹن پولیس کے مطابق 2012 کے بعد یہ پہلا موقع ہے کہ کسی احتجاجی مارچ پر پابندی لگائی گئی ہے، تاہم ایک محدود مظاہرے کی اجازت دی جائے گی۔

لندن پولیس کا کہنا ہے کہ یہ مارچ ایک ایسے گروپ کی جانب سے منظم کیا جاتا ہے، جو ایرانی حکومت کی حمایت کرتا ہے۔

فلسطین کے حق میں آئندہ اتوار کو ہونے والے سالانہ مارچ پر پابندی کے فیصلے پر وزیر داخلہ شبانہ محمود نے کہا کہ انہوں نے پولیس کی اس غیر معمولی درخواست کی منظوری دے دی ہے جس کا مقصد یہ تھا کہ اگر یوم القدس مارچ اور اس کے خلاف ممکنہ احتجاج ہوتے، تو سنگین عوامی بدامنی پیدا ہو سکتی تھی۔

شبانہ محمود نے کہا کہ وہ اس بات سے مطمئن ہیں کہ پابندی ضروری تھی کیونکہ احتجاج اور متعدد جوابی مظاہروں کا حجم بڑا ہونا تھا، خاص طور پر ایسے وقت پر جب مشرق وسطیٰ میں جاری تنازعے کی صورتحال بھی حساس ہے۔

انہوں نے مزید کہا کہ جو بھی شخص نفرت اور تقسیم کو ہوا دینے کی کوشش کرے گا، اس کے خلاف قانون کی مکمل طاقت استعمال کی جائے گی۔

اسلامک ہیومن رائٹس کمیشن، جو اس سالانہ مارچ کا اہتمام کرتا ہے، نے اس فیصلے کی سخت مذمت کرتے ہوئے اسے ’’سیاسی محرکات پر مبنی فیصلہ‘‘ قرار دیا ہے۔