قبائلی صحافیوں کو سنگین خطرات: ایچ آر سی پی وفد کا پشاور پریس کلب میں اجلاس

پشاور  (نمائندہ ڈیلی اردو) ہیومن رائٹس کمیشن آف پاکستان (ایچ آر سی پی) کے چیئرپرسن اسد اقبال بٹ کی سربراہی میں ایک اعلیٰ سطحی وفد نے پشاور پریس کلب میں خیبرپختونخوا کے مختلف اور قبائلی اضلاع سے تعلق رکھنے والے صحافیوں کے ساتھ اہم اجلاس کیا۔ اجلاس کا مقصد صحافیوں کو درپیش مشکلات کا جائزہ لینا اور ان کے حل کے لیے مؤثر اقدامات پر تبادلہ خیال تھا۔

اس موقع پر باڑہ پریس کلب کے سابق صدور خیال مت شاہ آفریدی اور خادم خان آفریدی، سینئر صحافی ابراہیم شینواری اور دیگر صحافیوں نے قبائلی اضلاع میں درپیش مسائل تفصیل سے بیان کیے۔ مقررین نے کہا کہ قبائلی علاقوں کے صحافی انتہائی مشکل اور غیرمحفوظ حالات میں اپنی ذمہ داریاں ادا کر رہے ہیں اور اکثر حساس رپورٹنگ کے باعث مختلف دباؤ کا سامنا کرتے ہیں۔

انہوں نے بتایا کہ گزشتہ سال 18 جون کو لنڈی کوتل پریس کلب کے سابق صدر اور پشتو نیوز چینل "خیبر ٹی وی" سے وابستہ صحافی خلیل جبران کو کالعدم تحریک طالبان پاکستان نے ہلاک کر دیا تھا، جب کہ ان کے ساتھی صحافی مہراب آفریدی کو تحریک طالبان پاکستان کی جانب سے سنگین دھمکیاں ملیں جس کے باعث وہ پچھلے 15 ماہ سے علاقہ چھوڑنے پر مجبور ہیں اور تاحال ان کے ٹھکانے کے بارے میں کسی کو علم نہیں۔ مقررین نے زور دیا کہ قبائلی صحافیوں کے لیے نہ کوئی مؤثر حفاظتی نظام ہے، نہ ہی قانونی معاونت میسر ہے۔

خادم خان آفریدی نے شکایت کی کہ تمام ضروری تقاضے پورے کرنے کے باوجود انفارمیشن ڈیپارٹمنٹ نے باڑہ پریس کلب کو تاحال ایک روپیہ بھی فنڈ جاری نہیں کیا جو نہایت افسوسناک ہے۔ انہوں نے مطالبہ کیا کہ فوری طور پر فنڈز ریلیز کیے جائیں۔

ایچ آر سی پی وفد نے تمام مسائل توجہ سے سنے اور یقین دہانی کرائی کہ ان خدشات کو ایک جامع شکل اعلیٰ سطح پر اجاگر کیا جائے گا۔ 

ایچ آر سی پی کی شریک چیئرپرسن منیزے جہانگیر نے کہا کہ قبائلی صحافیوں کی خدمات ناقابلِ فراموش ہیں اور ان کی حفاظت، آزادی اور پیشہ ورانہ تربیت کے لیے پالیسی سطح پر فوری اقدامات ضروری ہیں۔ انہوں نے کہا کہ ایچ آر سی پی ہر فورم پر ان کی آواز بلند کرے گا۔

اجلاس میں زور دیا گیا کہ آزادی صحافت کے فروغ اور انسانی حقوق کے تحفظ میں قبائلی صحافیوں کا کردار کلیدی ہے اور انہیں ہر ممکن تحفظ و معاونت فراہم کی جانی چاہیے۔

اس موقع پر ایچ آر سی پی کی چیئرپرسن اسد اقبال بٹ، منیزے جہانگیر، حسین نقی اور اسد اقبال بٹ، صدر پشاور پریس کلب کے صدر ایم ریاض، سینئر صحافی شمیم شاہد، خیبر یونین آف جرنلسٹ کے صدر کاشف الدین سید، سیف الاسلام سیفی، فرزانہ علی، شاہ نواز ترکزئی، سابق صدر پشاور پریس کلب ناصر حسین اور نبی جان اورکزئی سمیت بڑی تعداد میں صحافی شریک ہوئے۔