لاپتہ افراد پر بات ہو سکتی ہے، دہشت گردی ناقابلِ قبول ہے، رانا ثناءاللہ

لاہور (ڈیلی اردو)   پاکستان پاکستان کے وزیرِاعظم کے مشیر رانا ثناءاللہ نے کہا ہے کہ دہشت گردی کے پیچھے بھارت کا ہاتھ ہے اور لاپتہ افراد کے معاملے پر بات ہو سکتی ہے، تاہم دہشت گردی ہر صورت ناقابلِ قبول ہے۔

یہ بیان انہوں نے عاصمہ جہانگیر کانفرنس کے دوران دیا۔ رانا ثناءاللہ نے کہا کہ بلوچستان کے مسائل صرف ماضی پر افسوس کرنے سے حل نہیں ہوں گے بلکہ ان سے سبق سیکھنا ضروری ہے۔

انہوں نے بلوچستان کے دو بڑے چیلنجز سیاسی شکایات اور دہشت گردی قرار دیتے ہوئے کہا کہ انہیں الگ الگ طریقوں سے حل کیا جانا چاہیے، ایک ہی طریقے سے کوشش کرنا غلطی ہوگی۔

رانا ثناءاللہ نے کہا کہ لوگوں کو بسوں سے اتار کر ان کے اہلِ خانہ کے سامنے قتل کرنا دہشت گردی ہے اور جعفر ایکسپریس پر حملے کے دن بھارتی میڈیا نے جشن منایا، اس طرح کے تمام واقعات میں بھارت ملوث ہے۔

مشیرِ وزیراعظم نے کہا کہ سیاسی انجینئرنگ یا انتخابات سے متعلق تحفظات پر بات چیت ممکن ہے اور تعلیم، سڑکوں اور ترقی کے بدلے ہتھیار ڈالنے کی صورت میں مذاکرات بھی ہو سکتے ہیں۔

انہوں نے زور دیا کہ ریاست کی بقا دہشت گرد عناصر کے خاتمے میں ہے اور نواز شریف کا مؤقف ہے کہ تمام صوبوں کو ساتھ لے کر چلنا ہوگا۔ ان کے بقول، اگر پاکستان مضبوط ہوگا تو بلوچستان بھی مضبوط ہوگا۔