لاہور اور شیخوپورہ میں سی ٹی ڈی کی کارروائیاں، داعش کی پانچ خواتین دہشت گرد گرفتار

لاہور (نمائندہ ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) پنجاب نے صوبائی دارالحکومت لاہور اور شیخوپورہ میں مختلف کارروائیوں کے دوران کالعدم تنظیم کے 5 خواتین دہشت گردوں کو گرفتار کرلیا۔

ترجمان سی ٹی ڈی کے مطابق انٹیلی جنس بیسڈ کارروائی کے دوران داعش سے تعلق رکھنے والی 5 خواتین دہشت گردوں کی گرفتاری عمل میں آئی۔

بیان میں مزید کہا گیا ہے کہ لاہور سے 3 اور شیخوپورہ سے 2 خواتین کو گرفتار کیا گیا ہے، دہشت گردوں سے ممنوعہ کتابیں، موبائل فون، اسلحہ اور نقدی برآمد کرلی گئی۔

گرفتار خواتین دہشت گردوں کی شناحت، فاخرہ، سعدیہ، ایمن، جویریہ اور فائزہ کے نام سے ہوئی ہے۔

سی ٹی ڈی کا کہنا ہے کہ خواتین دہشت گردوں کے خلاف مقدمات درج کر کے تفتیش کا آغاز کردیا گیا ہے۔