لاہور میں پولیس موبائل کی ٹکر سے پانچ بہنوں کا اکلوتا بھائی شہریار علی جاں بحق

لاہور (نیوز ڈیسک) لاہور کے علاقے بادامی باغ میں پولیس موبائل کی موٹر سائیکل کو ٹکر سے 5 بہنوں کا اکلوتا بھائی جاں بحق اور دوسرا زخمی ہوگیا، اہل علاقہ نے لاش سڑک پر رکھ کر احتجاج کیا۔ پولیس اہلکار موقع سے فرارہو گئے۔ پولیس اہلکاروں کے خلاف مقدمہ درج کرلیا گیا۔

افسوسناک واقعہ بادامی باغ میں پولیس کی گاڑی کی مبینہ ٹکر سے 22 سالہ نوجوان شہر یار موقع پر ہی جاں بحق ہو گیا۔

پانچ بہنوں کا اکلوتا بھائی پولیس کی روایتی بے حسی اور غیر ذمہ داری کی بھینٹ چڑھ گیا۔شہریار کو دوستوں کے ساتھ جاتے پولیس نے روکا، نہ رکنے پر موٹر سائیکل کو ٹکر ماری۔ شہر یار علی موقع پر ہی جان کی بازی ہار گیا، دوست فیضان شدید زخمی ہوا۔

موٹرسائیکل کو ٹکر مارنے والے پولیس اہلکار اس طرح بدحواسی میں وہاں سے فرار ہوئے کہ سرکاری رائفل بھی وہیں ہی گِر گئی۔

ایس پی سٹی ڈیژن سید غضنفر علی شاہ موقع پر پہنچے اور انصاف کی یقین دہانی کرائی۔ اہل علاقہ اور ورثا 3 گھنٹے تک سراپا احتجاج رہے جس کے بعد پولیس اہلکاروں کے خلاف مقدمہ درج کر لیا گیا۔