لبنان میں اسرائیلی حملے میں حزب اللہ کا اعلیٰ کمانڈر 7 ساتھیوں سمیت ہلاک

بیروت (ڈیلی اردو رہورٹ) لبنان کے دارالحکومت بیروت کے جناح علاقے میں بدھ کی صبح اسرائیلی فضائی حملے میں حزب اللہ کے سینئر ترین کمانڈر یوسف اسماعیل ہاشم ہلاک ہو گئے۔ اس حملے میں ان کے سات دیگر ساتھی بھی ہلاک ہوئے، جبکہ متعدد زخمی بھی ہوئے۔

یوسف اسماعیل ہاشم عراق میں حزب اللہ کے عسکری امور کے سربراہ تھے اور حملے کے وقت وہ ایک میٹنگ میں موجود تھے۔ ذرائع کے مطابق یہ میٹنگ ایک خیمے میں ہو رہی تھی جب اچانک حملہ ہوا۔ اس دوران ایک اور اہم کمانڈر محمد باقر نابلسی بھی ہلاک ہو گئے۔

حزب اللہ نے تصدیق کی ہے کہ یوسف اسماعیل ہاشم تنظیم کے سب سے اعلیٰ عہدیدار تھے اور وہ عراق میں حزب اللہ کی عسکری سرگرمیوں کے ذمہ دار تھے۔ لبنانی سکیورٹی ذرائع اور حزب اللہ کے قریبی ذریعے نے بھی حملے کی تصدیق کی ہے۔ 

لبنان کی وزارت صحت کے مطابق اس حملے میں مجموعی طور پر سات افراد ہلاک ہوئے۔

سکیورٹی ذرائع کے مطابق یہ حملہ اسرائیل کی فضائی کارروائی کا حصہ تھا، جس کا مقصد حزب اللہ کے اعلیٰ کمانڈرز کو نشانہ بنانا تھا۔ 

حزب اللہ کے اندرونی ذرائع کے مطابق یوسف ہاشم کی ہلاکت تنظیم کے لیے ایک بڑا دھچکا ہے کیونکہ وہ عراق میں اس کی عسکری منصوبہ بندی کے مرکزی کردار تھے۔