لبنان میں اسرائیلی حملے، متعدد افراد ہلاک، درجنوں زخمی

بیروت (ڈیلی اردو/نیوز ایجنسیاں) لبنان کی وزارتِ صحت کے مطابق اسرائیلی حملے میں کفر حتیٰ کے علاقے میں کم از کم سات افراد ہلاک ہو گئے، جن میں ایک چار سالہ بچی بھی شامل ہے۔ یہ معلومات سرکاری خبر رساں ادارے این این اے کے حوالے سے سامنے آئی ہیں۔

رپورٹس کے مطابق کفر حتیٰ میں حملے کے نتیجے میں متعدد عمارتوں کو شدید نقصان پہنچا جبکہ کئی افراد کے زخمی ہونے کی اطلاعات بھی ہیں۔

دوسری جانب جنوبی بیروت کے علاقے جناح میں ہونے والے ایک اور اسرائیلی حملے میں چار افراد ہلاک اور 39 زخمی ہو گئے۔

اسرائیلی فوج کا کہنا ہے کہ وہ دارالحکومت بیروت میں حزب اللہ کے ٹھکانوں کو نشانہ بنا رہی ہے۔

مقامی ذرائع کے مطابق جنوبی بیروت کے مختلف علاقوں سے دھوئیں کے سیاہ بادل اٹھتے دیکھے گئے ہیں، جس سے صورتحال کی شدت کا اندازہ لگایا جا سکتا ہے۔