لوئر دیر: زمین کے تنازعہ پر دو گروپوں میں تصادم، 4 افراد جاں بحق، 2 زخمی

لوئر دیر (نمائندہ ڈیلی اردو) صوبہ خیبر پختونخوا کے ضلع لوئردیر کے علاقہ میدان میں جائیداد کے تنازعے پر فائرنگ کے نتیجے میں 4 افراد جاں بحق جبکہ 2 زخمی ہوگئے۔

تفصیلات کے مطابق فائرنگ کا واقعہ لوئر دیر کے علاقے تاران بالا میں گزشتہ شام پیش آیا جہاں دو فریقین کے درمیان زمین کے تنازعے پر فائرنگ ہوئی۔

پولیس کے مطابق فائرنگ سے ایک فریق سے بخت بادشاہ، دیدن بادشاہ پسران معشوق جان جبکہ فریق دوم سے شہاب الدین اور تاج محمد پسران بہادر خان ساکنان تاران جاں بحق اور 2 افراد زخمی ہو گئے۔

ایس ایچ او پولیس اسٹیشن میدان انسپکٹر شاہ فیصل کے مطابق چاروں جاں بحق افراد کی لاشیں اور دونوں زخمیوں کو ہسپتال منتقل کردیا گیا، جہاں زخمیوں کو طبی امداد فراہم کی جارہی ہے۔ ایس ایچ او نے میڈیا کو بتایا کہ جاں بحق افراد کی میتیں ضروری کارروائی کے بعد ورثاء کے حوالے کی جائیں گی۔

ایس ایچ او میدان کے مطابق دونوں فریقوں سے دس ملزمان کو گرفتار کرلیا ہے، گرفتار ملزمان سے اسلحہ بھی برآمدکرلیا ہے۔ ایس ایچ او نے بتایا کہ گرفتار ملزمان سے تفتیش جاری ہے۔