لکی مروت : پولیس اسٹیشن پر حملہ، اہلکاروں کی جوابی کارروائی پر حملہ آور فرار

لکی مروت (ویب ڈیسک) خیبرپختونخوا کے ضلع لکی مروت میں شادی خیل پولیس اسٹیشن کو مبینہ خوارج نے حملے کا نشانہ بنایا، تاہم پولیس اہلکاروں کی بروقت جوابی کارروائی کے باعث حملہ آور اپنے مقصد میں کامیاب نہ ہوسکے اور علاقے سے فرار ہوگئے۔

ابتدائی اطلاعات کے مطابق مسلح افراد نے پولیس اسٹیشن پر حملہ کیا، جس پر وہاں موجود اہلکاروں نے فوری طور پر جوابی فائرنگ کی۔ پولیس کی مزاحمت کے باعث حملہ آور زیادہ دیر تک مقابلہ جاری نہ رکھ سکے اور پسپائی اختیار کرتے ہوئے فرار ہوگئے۔

واقعے کے فوراً بعد پولیس اور سکیورٹی اہلکاروں نے علاقے کو گھیرے میں لے کر حملہ آوروں کی تلاش شروع کردی۔ قریبی علاقوں اور ممکنہ مشتبہ مقامات پر سرچ آپریشن کیا گیا، جبکہ فرار افراد کا سراغ لگانے کے لیے مختلف پہلوؤں سے کارروائی جاری ہے۔

حکام نے علاقے میں سکیورٹی مزید سخت کرتے ہوئے پولیس اور دیگر قانون نافذ کرنے والے اداروں کو ہائی الرٹ کردیا ہے۔ واقعے سے متعلق مزید تفصیلات تفتیش مکمل ہونے کے بعد سامنے آنے کا امکان ہے۔