لکی مروت اور باجوڑ میں شدت پسندوں کے پولیس پر حملے

خار + لکی مروت (نمائندگان ڈیلی اردو) پاکستان کے صوبے خیبر پختونخوا کے ضلع لکی مروت اور باجوڑ میں شدت پسندوں کی حملوں کی کوششیں ناکام ہوگئیں۔

لکی مروت حملہ

خیبر پختونخوا کے ضلع لکی مروت کے تھانہ ڈاڈیوالہ پر کالعدم تنظیم کے شدت پسندوں کا حملہ پولیس نے پسپا کردیا۔ پولیس کے مطابق شدت پسندوں نے تھانہ پر حملہ کیا تھا، جس کا علم پولیس کو تھرمل کیمروں سے ہوا۔ پولیس نے بھاری ہتھیاروں سے شدت پسندوں کا جواب دیا، جس کے نتیجے میں وہ فرار ہونے پر مجبور ہوگئے۔ خوش قسمتی سے اس حملے میں کوئی جانی نقصان نہیں ہوا۔

ڈسٹرکٹ پولیس آفیسر لکی مروت، محمد اسحاق نے کہا کہ پولیس نے شدت پسندوں کے حملے کو بھرپور طریقے سے پسپا کیا اور انہیں فرار ہونے پر مجبور کیا۔

باجوڑ میں پولیس پوسٹ پر ہینڈ گرنیڈ سے حملہ

قبائلی ضلع باجوڑ کے علاقے عنایت کلے بازار میں شدت پسندوں نے پولیس پوسٹ پر ہینڈ گرنیڈ سے حملہ کیا، تاہم خوش قسمتی سے حملے میں کوئی جانی نقصان نہیں ہوا۔ ڈسٹرکٹ پولیس آفیسر باجوڑ، وقاص رفیق نے کہا کہ حملے کے باوجود اہلکار محفوظ رہے اور فوراً سیکورٹی اقدامات کو مزید سخت کر دیا گیا۔

پولیس حکام نے شدت پسندوں کے خلاف بھرپور کارروائی کے عزم کا اظہار کیا ہے اور تحقیقات کا آغاز کردیا ہے۔

ان حملوں کی ذمہ داری کالعدم تحریک طالبان پاکستان نے قبول کرنے کا دعوی کیا ہے۔