لکی مروت میں سیکیورٹی فورسز کا آپریشن، کمانڈر سمیت 2 دہشت گرد ہلاک

لکی مروت (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع لکی مروت میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے سرائے نورنگ میں حالیہ آئی ای ڈی حملے میں ملوث 2 دہشت گردوں کو ہلاک کر دیا۔

تفصیلات کے مطابق پاک فوج نے لکی مروت کے علاقے کیچی کمر میں انٹیلی جنس بیسڈ آپریشن کیا، جہاں دہشت گردوں کی موجودگی کی اطلاع موصول ہوئی تھی۔ کارروائی کے دوران سیکیورٹی فورسز اور دہشت گردوں کے درمیان فائرنگ کا تبادلہ ہوا، جس میں کمانڈر کلیم اللہ عرف قیمہ سمیت 2 دہشت گرد ہلاک ہوگئے۔

سیکیورٹی ذرائع کے مطابق ہلاک دہشت گرد سرائے نورنگ میں حالیہ آئی ای ڈی دھماکے میں ملوث تھے اور شہریوں کو نشانہ بنانے کی منصوبہ بندی میں بھی شامل رہے تھے۔

ذرائع کا کہنا ہے کہ کارروائی کے بعد ہلاک دہشت گردوں کی لاشیں سرائے نورنگ بازار میں اُس مقام پر منتقل کی گئیں جہاں چند روز قبل آئی ای ڈی نصب کر کے حملے کی کوشش کی گئی تھی۔

سیکیورٹی حکام کے مطابق علاقے میں سرچ اور کلیئرنس آپریشن جاری ہے تاکہ مزید دہشت گردوں کی موجودگی کو ختم کیا جا سکے۔