لکی مروت میں شدت پسندوں کی فائرنگ، پولیس اہلکار اور بھائی ہلاک

لکی مروت (ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں شدت پسندوں نے فائرنگ کر کے ایک پولیس اہلکار اور ان کے بھائی کو ہلاک کر دیا۔

پولیس کے مطابق واقعہ شہناز خیل تھانے کی حدود میں شام تقریباً پانچ بجے پیش آیا، جہاں شدت پسندوں نے کانسٹیبل امیر نواز چوارخیل اور ان کے بھائی خانہ گل کو نشانہ بنایا۔ دونوں کی لاشیں ڈسٹرکٹ ہیڈ کوارٹر ہسپتال منتقل کر دی گئی ہیں۔

پولیس حکام کا کہنا ہے کہ فائرنگ کا واقعہ حیات خیل کے قریب پیش آیا۔ مقتولین سابق ضلع کونسلر علی گل چیئرمین کے بھائی تھے۔

پولیس کے مطابق واقعہ بظاہر ٹارگٹ کلنگ کا لگتا ہے، تاہم ملزمان کی گرفتاری اور واقعے کی وجوہات جاننے کے لیے تحقیقات جاری ہیں۔