لکی مروت میں پولیس کی کارروائی، کالعدم ٹی ٹی پی کا انتہائی مطلوب کمانڈر ہلاک

پشاور (ڈیلی اردو) صوبہ خیبر پختونخوا کے ضلع لکی مروت پولیس نے میرعالم منجیوالہ کے قریب دہشت گردوں کی موجودگی کی اطلاع پر انٹیلی جنس بیسڈ آپریشن کیا۔

ترجمان پولیس کے مطابق آپریشن کے دوران کالعدم تنظیم تحریک طالبان کا مقامی کمانڈر انتہائی مطلوب ریحان اللّٰہ المعروف منتظر اشناء ہلاک ہو گیا۔

ہلاک دہشت گرد لیفٹیننٹ عارف اللہ خان سمیت پولیس پر حملوں میں ملوث تھا۔

ڈی پی او لکی مروت محمد جواد اسحاق کے مطابق ہلاک ملزم بھتہ خوری، اغواء، ٹارگٹ کلنگ سمیت سنگین مقدمات میں پولیس اور سی ٹی ڈی کو مطلوب تھا۔

انہوں نے کہا کہ آپریشن کے دوران دہشت گردوں نے پولیس پر خودکار ہتھیاروں سے فائرنگ کی، ہلاک دہشت گرد کے قبضے سے کلاشنکوف، میگزین اور ہینڈگرنیڈ بھی برآمد ہوا۔

آئی جی پی ذوالفقارحمید نے لکی مروت پولیس کی کارروائی پر نقد انعامات کا اعلان کیا اور کہا کہ آخری دہشت گرد کے خاتمے تک چین سے نہیں بیٹھیں گے۔