ماضی میں دہشت گردوں سے لڑنے والی فورس غیر تربیت یافتہ تھی، مجسن نقوی

اسلام آباد (نمائندہ ڈیلی اردو) وفاقی وزیرِ داخلہ محسن نقوی کا کہنا ہے کہ ماضی میں دہشت گردوں سے لڑنے کے لیے جو فورس موجود تھی، اسے مطلوبہ تربیت حاصل نہیں تھی، تاہم اب حالات کے مطابق جدید تربیت اور سہولیات فراہم کی جا رہی ہیں۔

اسلام آباد میں پولیس لائن ہیڈ کوارٹر میں پاسنگ آؤٹ پریڈ کی تقریب سے خطاب کرتے ہوئے انہوں نے کہا کہ موجودہ صورتحال اور دہشت گردی کی لہر سے نمٹنے کے لیے ایک مؤثر اور پیشہ ور فورس ناگزیر تھی۔ 

ان کا کہنا تھا کہ نئی سہولیات سے نہ صرف مقامی بلکہ باہر سے آنے والے جوان اور افسران بھی تربیت حاصل کریں گے۔

بعد ازاں اسلام آباد میں صحافیوں سے گفتگو کرتے ہوئے محسن نقوی نے کہا کہ اسلام آباد کی نئی جیل آئندہ دو ماہ میں مکمل ہو جائے گی، جہاں آنکھوں کے علاج سمیت تمام بنیادی سہولیات دستیاب ہوں گی۔ 

انہوں نے بتایا کہ چونکہ عمران خان کو سزا اسلام آباد کی عدالت سے ہوئی ہے، اس لیے جیل مکمل ہونے پر انہیں اسلام آباد منتقل کیا جائے گا۔

وزیرِ داخلہ کا کہنا تھا کہ دہشت گردوں کے خاتمے کے لیے کوئی کمی نہیں چھوڑی جائے گی اور انہیں نوجوان اہلکاروں سے بہت امیدیں وابستہ ہیں۔ 

انہوں نے مزید کہا کہ آئندہ دنوں میں ٹریفک پولیس اور ڈرائیونگ لائسنس کے نظام میں بھی اصلاحات کی جائیں گی۔