مالاکنڈ، لکی مروت اور باجوڑ میں فائرنگ اور گولہ باری کے واقعات، 3 افراد ہلاک، 2 زخمی

اسلام آباد (نمائندگان ڈیلی اردو ) پاکستان کے شورش زدہ صوبے خیبر پختونخوا میں تشدد کے مختلف واقعات میں 3  افراد ہلاک اور 2 زخمی ہوگئے۔

مالاکنڈ کی تحصیل درگئی میں نامعلوم مسلح افراد کی فائرنگ سے درگئی بار کے صدر خالد خان ایڈوکیٹ ہلاک ہوگئے۔ لیویز ذرائع کے مطابق مسلح افراد خالد خان ایڈوکیٹ پر فائرنگ کے بعد موقع سے فرار ہونے میں کامیاب ہوگئے، واقعے کے بعد لیویز نے علاقے میں سرچ آپریشن شروع کردیا ہے۔

ادھر لکی مروت کے تھانہ برگئی کی حدود کوٹکہ شیروان میں فائرنگ کے ایک اور واقعے میں نوجوان ادریس خان ہلاک ہوگیا۔

اسی دوران باجوڑ کی تحصیل ماموند کے علاقے نختر میں سول آبادی پر مارٹر گولہ گرنے سے یعقوب ولد محمدان سید موقع پر ہلاک جبکہ اس کا بھائی غنی زخمی ہوگیا۔

مقامی ذرائع کے مطابق زخمی کو قریبی اسپتال منتقل کردیا گیا ہے جبکہ سیکیورٹی اداروں نے متاثرہ علاقوں میں تحقیقات شروع کردی ہیں۔