متحدہ عرب امارات میں ’تعمیری‘ مذاکرات ہوئے، یوکرینی صدر زيلنسکی

ابو ظہبی (ڈیلی اردو/ڈی پی اے) یوکرینی صدر وولودیمیر زيلنسکی نے آج ہفتے کے روز کہا ہے کہ روس کے ساتھ جنگ کے خاتمے کے لیے امریکی ثالثی میں ہونے والے ’’تعمیری‘‘ مذاکرات میں ’’بہت سی‘‘ باتوں پر تبادلہ خیال کیا گیا ہے، جبکہ مذاکرات کا اگلا دور ممکنہ طور پر ’’اگلے ہفتے‘‘ متوقع ہے۔

مذاکرات کے اختتام کے بعد سوشل میڈیا پر اپنے پیغام میں یوکرینی صدر نے کہا، ’’بہت سی باتوں پر بحث ہوئی، اور یہ اہم ہے کہ بات چیت تعمیری رہی۔‘‘

انہوں نے مزید کہا، ’’اگر آگے بڑھنے کی آمادگی موجود ہو، اور یوکرین تیار ہے، تو مزید ملاقاتیں ہوں گی، جو ممکنہ طور پر اگلے ہفتے ہی شروع ہو سکتی ہیں۔‘‘

متحدہ عرب امارات کے دارالحکومت ابو ظہبی میں امریکی ثالثی میں ہونے والے مذاکرات یوکرین جنگ کے ان دونوں فریقوں کے درمیان کئی ماہ کے دوران کا پہلا براہ راست رابطہ ہے، جن کا مقصد فروری 2022ء سے جاری جنگ کا خاتمہ ہے۔

یوکرینی صدر زیلنسکی کے مطابق، ’’اس بات پر اتفاق پایا گیا ہے کہ جنگ کے خاتمے کے عمل کی امریکی نگرانی اور کنٹرول، اور حقیقی سکیورٹی کو یقینی بنانا ضروری ہے۔‘‘

امریکی نمائندوں اسٹیو وٹکوف اور جیرڈ کشنر نے یوکرینی حکام کے ساتھ شرکت کی، جن میں چیف مذاکرات کار رستم عمیروف اور ملٹری انٹیلیجنس کے سربراہ کیریلو بڈانوف شامل تھے۔ زیلینسکی کے مطابق، روس نے بھی ملٹری انٹیلیجنس اور فوج کے نمائندے بھیجے تھے۔

اگرچہ زیلینسکی نے جمعرات کو داووس، سوئٹزرلینڈ میں کہا کہ امن کا ممکنہ معاہدہ ’’تقریباً تیار‘‘ ہے، لیکن بعض حساس معاملات، خاص طور پر علاقائی مسائل سے متعلق نکات، ابھی تک حل طلب ہیں۔