متحدہ عرب امارات کا کشمیریوں کے زخموں پر نمک پاشی کا سلسلہ جاری

ابوظہبی (ڈیلی اردو) متحدہ عرب امارات نے نریندر مودی کی خوشی کے لیے گاندھی کے ڈاک ٹکٹ بھی جاری کر دیے۔

رپورٹ میں بتایا گیا کہ مودی کی خوشی کی خاطر متحدہ عرب امارات پوسٹ کی طرف سے گاندھی کی سالگرہ پر ڈاک ٹکٹ جاری کر دیے۔ جو کہ پاکستان خاص طور پر کشمیریوں کے زخموں پر نمک پاشی کا ایک اور اقدام ثابت ہوا۔

بھارتی وزیراعظم کو متحدہ عرب امارات کی طرف سے اعلیٰ ترین سول ایوارڈ دینے کے بعد یواے ای پوسٹ آفس نے گاندھی کی 150 ویں سالگرہ پر یاداشتی ڈاک ٹکٹ شائع کیے۔

واضح رہے نریندر مودی کو متحدہ عرب امارات میں اعلیٰ ترین سول ایوارڈ سے نوازا گیا۔ انتخابات میں کامیابی کے بعد بھارتی وزیراعظم نے متحدہ عرب امارات کا پہلا دورہ کیا جس میں انہوں نے ایوان صدر میں متحدہ عرب امارات کے ولی عہد اور متحدہ عرب امارات کی مسلح افواج کے ڈپٹی کمانڈر شیخ محمد بن زید النہیان سے ملاقات کی۔

اس موقع پر ایک تقریب منعقد کی گئی جس میں بھارتی وزیراعظم نریندر مودی کو متحدہ عرب امارات کا اعلیٰ ترین سول ایوارڈ ”زید ایوارڈ” دیا گیا۔

خلیج ٹائمز کو دیے گئے خصوصی انٹرویو میں بھارتی وزیراعظم کا کہنا تھا کہ میں متحدہ عرب امارات کا اعلیٰ ترین سول ایوارڈ حاصل کر کے انتہائی خوش ہوں۔ انہوں نے کہا کہ یہ ایوارڈ بھارت اور متحدہ عرب امارات کے مابین فروغ پاتے تعلقات کی گواہی ہے اور 1.3 بلین بھارتی عوام کے لیے باعث فخر ہے۔