مستونگ میں دہشت گردوں نے کوئٹہ-تفتان شاہراہ کا پُل اڑا دیا، 6 گاڑیاں نذر آتش

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع مستونگ میں دہشت گردوں نے دھماکہ خیز مواد سے ایک پُل کو اڑا دیا جبکہ چار گاڑیوں کو بھی نذرِ آتش کر دیا گیا۔

مقامی پولیس کے مطابق بلوچ مسلح دہشت گردوں نے جمعے کے روز آباد کے علاقے میں کوئٹہ-تفتان شاہراہ پر واقع ایک پُل کے ساتھ دھماکہ خیز مواد نصب کیا، جو دھماکے سے پھٹ گیا۔ تاہم ابتدائی طور پر یہ واضح نہیں ہو سکا کہ پُل کو کتنا نقصان پہنچا ہے۔

پولیس حکام کا کہنا ہے کہ دھماکے سے پُل کو جزوی نقصان پہنچا، تاہم چھوٹی گاڑیوں کی آمد و رفت جاری ہے جبکہ ہیوی ٹریفک کو متبادل راستے سے گزارا جا رہا ہے۔

حکام کے مطابق دہشت گردوں نے چار گاڑیوں کو بھی آگ لگا دی۔

اسی دوران خاران کے علاقے اُرماگے، شے عثمان پٹ میں نامعلوم مسلح افراد نے معدنیات لے جانے والے دو ٹرکوں کو نذرِ آتش کر دیا۔ واقعے کے بعد علاقے میں خوف و ہراس پھیل گیا جبکہ سکیورٹی فورسز نے سرچ آپریشن شروع کر دیا ہے۔

حکام کے مطابق مستونگ میں گزشتہ روز آباد کے قریب درینگڑھ کے علاقے میں ایک پولیس تھانے کو بھی نذرِ آتش کیا گیا تھا۔

ان حملوں کی ذمہ داری کالعدم بلوچ لبریشن آرمی (بی ایل اے) اور کالعدم بلوچ لبریشن فرنٹ (بی ایل ایف) نے قبول کرنے کا دعویٰ کیا ہے۔