مسلح افواج ہمیشہ پاکستان پولیس کے شانہ بشانہ کھڑی رہیں گی، فیلڈ مارشل عاصم منیر

اسلام آباد (ڈیلی اردو) فیلڈ مارشل عاصم منیر نے کہا ہے کہ مضبوط اور عوام دوست پولیس داخلی سلامتی کے لیے ناگزیر ہے، جبکہ قانون و امن کا نفاذ پولیس کی ایک مقدس ذمہ داری ہے۔

پاکستانی فوج کے شعبۂ تعلقاتِ عامہ (آئی ایس پی آر) کے مطابق فیلڈ مارشل عاصم منیر نے نیشنل پولیس اکیڈمی اسلام آباد کا دورہ کیا، جہاں انہوں نے پولیس سروس آف پاکستان کے افسران سے ملاقات اور گفتگو کی۔ اس موقع پر وفاقی وزیر داخلہ اور وزیر مملکت برائے داخلہ بھی موجود تھے۔

آئی ایس پی آر کے مطابق نیشنل پولیس اکیڈمی پہنچنے پر فیلڈ مارشل عاصم منیر کا کمانڈنٹ اکیڈمی نے پُرتپاک استقبال کیا، جبکہ مستعد پولیس دستے نے انہیں گارڈ آف آنر پیش کیا۔ فیلڈ مارشل نے پولیس کے ہلاک اہلکاروں کی یادگار پر پھول رکھے اور فاتحہ خوانی کی، اور فرائض کی انجام دہی کے دوران جانوں کا نذرانہ پیش کرنے والے پولیس اہلکاروں کو خراجِ عقیدت پیش کیا۔

فیلڈ مارشل عاصم منیر نے دہشت گردی، جرائم اور سکیورٹی چیلنجز کے خلاف جدوجہد میں پولیس اہلکاروں کی قربانیوں اور خدمات کو سراہا۔ انہوں نے آئی جیز، ایڈیشنل آئی جیز اور دیگر سینئر پولیس افسران سے خطاب کرتے ہوئے بین الاداراتی تعاون اور جدید پولیسنگ کے نظام کی اہمیت پر زور دیا۔

آئی ایس پی آر کے مطابق فیلڈ مارشل نے عوامی اعتماد کو قانون نافذ کرنے والے اداروں کی بنیاد قرار دیتے ہوئے کہا کہ مضبوط اور عوام دوست پولیس داخلی سلامتی کے لیے ناگزیر ہے، جبکہ قانون و امن کا مؤثر نفاذ پولیس کی ایک اہم اور مقدس ذمہ داری ہے۔

فیلڈ مارشل عاصم منیر کا کہنا تھا کہ مسلح افواج ہمیشہ پاکستان پولیس کے شانہ بشانہ کھڑی رہیں گی اور ملک کے امن و استحکام کے لیے ہر ممکن تعاون جاری رکھیں گی۔