مہمند میں سیکورٹی فورسز کا آپریشن، 2 دہشت گرد ہلاک، خودکش جیکٹ برآمد

غلنئی (ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع مہمند میں سیکیورٹی فورسز کی کارروائی میں 2 دہشت گرد ہلاک ہو گئے۔

سیکیورٹی ذرائع کے مطابق ضلع مہمند کے علاقے شیخ بانڈہ میں 4 جون 2026 کو کی گئی کارروائی کے دوران دو دہشت گردوں کو ہلاک کیا گیا۔

حکام کا کہنا ہے کہ ہلاک ہونے والوں میں شامل ایک شخص کے قبضے سے افغان امارت کا شناختی کارڈ، غیر ملکی کرنسی، جدید اسلحہ اور ایک خودکش جیکٹ برآمد ہوئی۔

ذرائع کے مطابق شناختی کارڈ پر نام عمر بلال درج ہے اور اس کا تعلق افغانستان کے صوبہ خوست سے بتایا گیا ہے۔

سیکیورٹی فورسز کے مطابق علاقے میں سرچ اور کلیئرنس آپریشن مکمل کر لیا گیا ہے، جبکہ دہشت گردی کے خاتمے کے لیے کارروائیاں جاری رکھنے کے عزم کا اظہار کیا گیا ہے۔

حکام کا کہنا ہے کہ واقعے سے متعلق مزید تحقیقات جاری ہیں۔