میانمار: مذہبی تہوار پر پیراگلائیڈر کے ذریعے بم حملہ، 24 افراد ہلاک، درجنوں زخمی

ینگون (ڈیلی اردو/بی بی سی)  میانمار کے وسطی علاقے میں ایک مذہبی تہوار کے دوران پیراگلائیڈر کی مدد سے کیے گئے بم حملے میں کم از کم 24 افراد ہلاک اور 47 زخمی ہو گئے ہیں۔

برطانوی خبر رساں ادارے بی بی سی سے گفتگو کرتے ہوئے نیشنل یونٹی گورنمنٹ (NUG) کے ترجمان نے بتایا کہ حملہ اس وقت ہوا جب چاؤنگ او ٹاؤن شپ میں بدھ مت کے ماننے والے تقریباً سو افراد تھادنگیوٹ فیسٹیول منانے کے لیے جمع تھے۔

اینٹی جنتا گروپ پیپلز ڈیفنس فورس (PDF) سے تعلق رکھنے والے ایک مقامی اہلکار کے مطابق، ایک موٹر سے چلنے والے پیراگلائیڈر (پیراموٹر) نے ہجوم کے اوپر سے پرواز کرتے ہوئے دو بم گرائے، جس کے نتیجے میں درجنوں افراد موقع پر ہی ہلاک یا زخمی ہو گئے۔

عینی شاہدین کے مطابق، دھماکے اتنے شدید تھے کہ کئی لاشوں کی شناخت ممکن نہیں رہی۔

میانمار میں فروری 2021 کی فوجی بغاوت کے بعد سے ملک میں مسلح جھڑپیں جاری ہیں۔ اقوامِ متحدہ کے اندازوں کے مطابق، اس خانہ جنگی میں اب تک 5000 سے زائد عام شہری ہلاک ہو چکے ہیں۔

دوسری جانب، ایمنسٹی انٹرنیشنل نے منگل کو جاری بیان میں کہا ہے کہ موٹر سے چلنے والے پیراگلائیڈرز کے ذریعے شہری آبادی پر بم حملے کرنا جنتا کی جانب سے ایک "نیا مگر تشویشناک رجحان" ہے، جو بین الاقوامی انسانی قوانین کی سنگین خلاف ورزی کے زمرے میں آتا ہے۔