نائجیریا میں خونریز جہادی حملہ، 20 افراد ہلاک

ابوجا (ڈیلی اردو/اے ایف پی) شمال مغربی نائجیریا میں مشتبہ شدت پسندوں کے ایک حملے میں 20 افراد ہلاک ہو گئے ہیں۔ 

حملہ آوروں کا تعلق مبینہ طور پر لاکوراوا نامی گروہ سے بتایا جا رہا ہے، جسے گزشتہ سال دسمبر میں امریکی فضائی حملوں کا بھی نشانہ بنایا گیا تھا۔

اے ایف پی نے اقوام متحدہ کے لیے تیار کی گئی ایک خفیہ سکیورٹی رپورٹ کے حوالے سے بتایا ہے کہ لاکوراوا کے جنگجوؤں نے نائجیریا کے صوبے کیبی اسٹیٹ کے علاقے اریوا میں واقع فیسکن رافی نامی کمیونٹی پر حملہ کیا۔ یہ علاقہ نائجر کی سرحد کے قریب واقع ہے۔

رپورٹ کے مطابق حملہ آوروں نے گاؤں پر دھاوا بول کر ’’20 سے زائد افراد کو قتل‘‘ کر دیا۔

مقامی ذرائع کے مطابق یہ حملہ چند روز قبل ہوا تھا،  تاہم اس کی تفصیلات اس وقت منظر عام پر آئیں جب صوبے کے نائب گورنر نے متاثرہ علاقے کا دورہ کیا۔