نوشہرہ اور چارسدہ میں شدت پسندوں کے حملے، اے ایس آئی ہلاک، سب انسپکٹر شدید زخمی

نوشہرہ + چارسدہ (نمائندگان ڈیلی اردو) صوبہ خیبر پختونخوا میں پولیس اہلکاروں پر شدت پسندوں کے حملے جاری، نوشہرہ اور چارسدہ میں دو مختلف واقعات میں ایک پولیس افسر ہلاک جبکہ دوسرا شدید زخمی ہوگیا۔

تفصیلات کے مطابق، نوشہرہ کے علاقے خشکی روڈ پر نامعلوم شدت پسندوں نے پولیس اے ایس آئی الیاس خان پر اندھا دھند فائرنگ کردی، جس کے نتیجے میں وہ موقع پر ہی ہلاک ہوگئے۔ فائرنگ کے دوران ان کی گاڑی بے قابو ہوکر کھائی میں جاگری۔ واقعے کے فوراً بعد پولیس نے علاقے کو گھیرے میں لے کر تحقیقات کا آغاز کر دیا ہے۔

دوسری جانب، چارسدہ کے عمرزئی بازار میں شدت پسندوں نے ٹریفک پولیس کے سب انسپکٹر محمد سلمان پر حملہ کیا، جس سے وہ شدید زخمی ہوگئے۔ زخمی افسر کو فوری طور پر ڈی ایچ کیو ہسپتال چارسدہ منتقل کیا گیا، تاہم تشویشناک حالت کے باعث انہیں پشاور ریفر کر دیا گیا۔

سیکیورٹی فورسز نے دونوں واقعات کے بعد علاقے کو گھیرے میں لے کر سرچ آپریشن شروع کر دیا ہے جبکہ حملہ آوروں کی تلاش جاری ہے۔ پولیس حکام کا کہنا ہے کہ شدت پسندوں کے خلاف کارروائیاں مزید تیز کی جائیں گی۔