نیو اسٹارٹ ختم: جوہری وارہیڈز کی حد پر روس کا مشروط اتفاق

ماسکو (ڈیلی اردو)روس نے بدھ کے روز کہا ہے کہ وہ امریکہ کے ساتھ ختم ہونے والے اسلحہ کنٹرول معاہدے "نیو اسٹارٹ" میں طے شدہ جوہری ہتھیاروں کی حدود کی پابندی جاری رکھے گا، بشرطیکہ واشنگٹن بھی ان حدود پر عمل کرے۔

نیو اسٹارٹ معاہدہ، جو دنیا کی دو بڑی جوہری طاقتوں کے درمیان آخری فعال اسلحہ کنٹرول معاہدہ تھا، رواں ماہ کے آغاز میں ختم ہو گیا۔ 

روسی صدر ولادیمیر پوٹن کی جانب سے جوہری ذخیرے کی حد کو ایک سال کے لیے بڑھانے کی پیشکش پر امریکہ کی طرف سے تاحال کوئی باضابطہ جواب سامنے نہیں آیا۔

روسی وزیر خارجہ سرگئی لاوروف نے روسی پارلیمنٹ سے خطاب کرتے ہوئے کہا کہ ماسکو کو نئے ہتھیار تیار کرنے اور تعینات کرنے کی کوئی جلدی نہیں۔ ان کا کہنا تھا، ’’ہم اس بات سے رہنمائی لیتے ہیں کہ ہمارے صدر کی جانب سے اعلان کردہ یہ پابندی برقرار رہے گی، لیکن صرف اس وقت تک جب تک امریکہ مقررہ حدود سے تجاوز نہیں کرتا۔‘‘

لاوروف کا یہ بیان وزارتِ خارجہ کے گزشتہ ہفتے کے مؤقف سے مختلف ہے، جس میں کہا گیا تھا کہ روس خود کو معاہدے کی شرائط کا پابند نہیں سمجھتا۔

دونوں فریقوں نے عندیہ دیا ہے کہ وہ مستقبل میں کسی نئے اسلحہ کنٹرول معاہدے پر بات چیت کے خواہاں ہیں۔ 

واشنگٹن چاہتا ہے کہ چین کو بھی مذاکرات میں شامل کیا جائے کیونکہ اس کا جوہری ذخیرہ تیزی سے بڑھ رہا ہے، جبکہ ماسکو کا کہنا ہے کہ اگر چین کو شامل کیا جاتا ہے تو امریکہ کے جوہری اتحادی برطانیہ اور فرانس کو بھی مذاکرات کا حصہ بنایا جانا چاہیے۔

نیو اسٹارٹ معاہدے کے خاتمے کے بعد کئی دہائیوں میں پہلی بار ایسی صورت حال پیدا ہوئی ہے کہ دنیا کے سب سے تباہ کن ہتھیاروں کی تعیناتی کو محدود کرنے والا کوئی معاہدہ موجود نہیں، جس سے نئی اسلحہ دوڑ کے خدشات بڑھ گئے ہیں۔

یاد رہے کہ نیو اسٹارٹ معاہدے کے تحت امریکہ اور روس دونوں کو زیادہ سے زیادہ 1,550 جوہری وارہیڈز رکھنے کی اجازت تھی۔