واشنگٹن اور تہران میں بڑا بریک تھرو، امریکہ اور ایران نے حملے روکنے پر اتفاق کر لیا

واشنگٹن/تہران (ڈیلی اردو) عبوری امن معاہدے کے باوجود گزشتہ ویک اینڈ پر ایک دوسرے کے خلاف مسلح حملوں کے بعد امریکہ اور ایران کے مابین ایسی عسکری کارروائیاں روک دینے اور آپس میں تکنیکی سطح کے مذاکرات دوبارہ شروع کرنے پر اتفاق رائے ہو گیا ہے۔

ایران جنگ کے خاتمے کے لیے پاکستان کی ثالثی میں ایک مفاہمتی دستاویز پر دستخطوں کے باوجود تہران اور واشنگٹن کی طرف سے ایک دوسرے کے عسکری اور اقتصادی اہداف کا نشانہ بنانے کا جو سلسلہ 27 اور 28 جون کو دیکھنے میں آیا، اس کے تناظر میں ایک اعلیٰ امریکی اہلکار نے اتوار 28 جون کو رات گئے بتایا کہ دونوں ممالک کے مابین ’ادلے کا بدلہ‘ نوعیت کے جن تازہ ترین مسلح حملوں کا تبادلہ ہوا، ان کے بعد ایسی عسکری کارروائیاں روک دینے اور تکنیکی سطح کے باہمی مذاکرات بحال کرنے پر اتفاق رائے ہو گیا ہے۔

اس امریکی اہلکار نے صحافیوں کو بتایا، ’’اب دوطرفہ مفاہمتی دستاویز میں شامل کردہ تمام نکات پر تکنیکی مذاکرات کی بحالی ایک طے شدہ بات ہے۔‘‘

ساتھ ہی اس اہلکار نے مزید کہا، ’’فریقین اب حملے روک دیں گے اور آبنائے ہرمز کے خطے اور اس کے ارد گرد کے سمندری علاقے میں تمام بحری جہاز اب آزادانہ نقل و حرکت کر سکیں گے۔‘‘

امریکی نیوز ویب سائٹ ایکسیئس نے بتایا ہے کہ واشنگٹن اور تہران کے مذاکراتی نمائندوں کی آئندہ ملاقات منگل 30 جون کو قطر کے دارالحکومت دوحہ میں ہو گی۔

ایران جنگ کے دوران امریکہ اور ایران کے مابین اپریل سے فائر بندی پر عمل جاری ہے، لیکن دونوں کے مابین حملوں کے بار بار کے تبادلے کی وجہ سے تیل اور گیس کی عالمی تجارت کے لیے انتہائی اہم آبنائے ہرمز میں معمول کی کمرشل شپنگ بار بار خطرے میں پڑ جاتی ہے۔

کل اتوار 28 جون کو امریکی فوج کی مرکزی کمان نے بتایا تھا کہ اس نے ’’تجارتی جہاز رانی کے خلاف ایران کے مسلسل جارحانہ اقدامات کے باعث‘‘ ایران میں نئے سرے سے 10 عسکری اہداف پر حملے کیے تھے۔

ان حملوں کے جواب میں ایران نے بھی خلیجی ریاستوں بحرین اور کویت میں امریکی عسکری مفادات کو راکٹوں اور میزائلوں سے نشانہ بنانے کی کوشش کی تھی۔