وزیراعلیٰ خیبر پختونخوا کا بڑا انکشاف: “آئی ایس آئی اور ایم آئی نے طالبان کی پشت پناہی کی”

واشنگٹن (ش ح ط) ‏خیبر پختونخوا کے وزیراعلیٰ علی امین گنڈا پور نے پاکستان کے ریاستی اداروں پر سنگین الزامات عائد کرتے ہوئے کہا ہے کہ جب صوبائی حکومت نے نام نہاد "گڈ طالبان" کے خلاف کارروائیاں کیں اور انہیں علاقہ بدر کیا، تو بعد ازاں پاکستان کی دو بڑی خفیہ ایجنسیوں آئی ایس آئی اور ایم آئی نے مداخلت کرتے ہوئے ان عناصر کو "اپنے لوگ" قرار دے کر رہا کرنے کی درخواست کی۔

وزیراعلیٰ نے کہا: “ہم نے گڈ طالبان کے خلاف آپریشن کیا، انہیں نکالا، تو انٹر سروسز انٹیلی جنس (ISI) اور  ملٹری انٹیلیجنس (MI) کے افسران نے کہا کہ یہ ہمارے لوگ ہیں، مہربانی کر کے انہیں چھوڑ دیں۔”

انہوں نے مزید کہا: “وردی کے ذریعے جنگ لڑیں، گڈ طالبان کی بات چھوڑیں۔ اگر ان کی واقعی ضرورت ہے تو انہیں وردی پہنا کر کشمیر میں بھیجیں، خیبر پختونخوا کے عوام پر مسلط نہ کریں۔”

علی امین گنڈا پور نے انکشاف کیا کہ جب ان کی حکومت نے مختلف علاقوں کو شدت پسند عناصر سے پاک کیا، تو انہی علاقوں میں بعد ازاں ان ہی عناصر کو دوبارہ لا کر بٹھایا گیا، اور ریاستی اداروں نے ان کی سرپرستی کی۔ “ہم نے قربانیاں دے کر علاقے خالی کرائے، لیکن انہی لوگوں کو دوبارہ لایا گیا، اور اداروں نے انہیں اپنا بنا لیا۔”

خیبر پختونخوا میں امن و امان کی بگڑتی صورتحال پر آل پارٹیز کانفرنس (اے پی سی) کے بعد میڈیا سے گفتگو کرتے ہوئے علی امین گنڈا پور نے کہا کہ صوبے میں کسی بھی فیڈرل فورس کو آپریشن کی اجازت نہ دیں گے اور نہ ہی کوئی آپریشن قبول کریں گے، صوبے میں جو بھی کارروائیاں کی جارہی ہیں، ہمیں اُن میں اعتماد میں نہیں لیا جارہا۔

علی امین گنڈا پور نےکہا کہ امن و امان کے لیے آپریشن میں عوام اور فورسز کا نقصان ہے، گُڈ طالبان کی کوئی گنجائش نہیں، دہشت گردوں کے خلاف اب ڈرون استعمال نہیں ہوگا۔

وزیراعلیٰ خبیرپختونخوا کا مزید کہنا تھا کہ بارڈر کی سیکیورٹی وفاقی حکومت کی ذمہ داری ہے، وفاق اپنے فورسز کو بارڈر پر بھیج دے، قبائلی عوام کے ساتھ کیے گئے وعدے تاحال پورے نہیں ہوئے، وفاق جلد این ایف سی بلائے، ہمیں قبائلی علاقوں کا حق دیا جائے، قبائلی علاقوں سے مقامی لوگوں کو صوبائی پولیس میں بھرتی کریں گے۔

ادھر وزیراعلیٰ خیبرپختونخوا علی امین گنڈا پور کے ڈرون استعمال نہ کرنے کے بیان کو وزیر داخلہ محسن نقوی نے مسترد کردیا۔

سماجی رابطے کی ویب سائیٹ ایکس پر اپنی ٹویٹ میں وزیر داخلہ محسن نقوی نے کہا کہ دہشت گردوں کے خلاف تمام وسائل استعمال ہوں گے۔

وفاقی وزیر داخلہ نے صوبائی عہدیدار پر ڈی آئی خان میں طالبان کو ماہانہ چندہ دینے کا الزام عائد کیا۔ سوال کیا ایک اہم صوبائی عہدے دار طالبان کو کتنے پیسے ہر  ماہ دیتا ہے؟

خیال رہے کہ پاکستان مسلم لیگ (ن)، پیپلزپارٹی، عوامی نیشنل پارٹی اور جمعیت علمائے اسلام (ف) سمیت دیگر اپوزیشن جماعتوں نے خیبرپختونخوا حکومت کی جانب سے امن و امان کی صورتحال پر بلائی گئی آل پارٹیز کانفرنس کا بائیکاٹ کیا ہے۔