وطن کیلئے جان کا نذرانہ پیش کرنے سے بڑی کوئی قربانی نہیں: آرمی چیف قمر جاوید باجوہ

راولپنڈی (ڈیلی اردو) آرمی چیف جنرل قمر جاوید باجوہ شہید لیفٹیننٹ کرنل راشد کریم بیگ، لیفٹیننٹ کرنل وسیم حیات اور شہید سپاہی غلام رضا کے گھر گئے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے شہید لیفٹیننٹ کرنل راشد کریم بیگ، شہید لیفٹیننٹ کرنل وسیم حیات اور سپاہی غلام رضا کے اہلخانہ سے ملاقات کی۔

اس موقع پر آرمی چیف کا کہنا تھا کہ ہیروز کو یاد رکھنا مسلح افواج اور قوم دونوں کے دلوں کو گرمانے کا ذریعہ ہے۔

انہوں نے کہا کہ مادر وطن کے دفاع کیلئے زندگی قربان کرنا سب سے بڑی قربانی ہے اور اس قربانی پر شہداء کے اہلخانہ کا احسان کبھی نہیں اتار سکتے۔

آرمی چیف نے کہا کہ ہم اپنے شہداء کی قربانیوں پر ان کا اتنا شکریہ ادا نہیں کر سکتے جتنا ان کا حق ہے۔انہوں نے کہا کہ ان سے رابطے میں رہنا ہمارا فرض ہے اور ان کی تمام عمر دیکھ بھال ہماری ذمہ داری ہے۔