ٹانک اور ڈیرہ اسماعیل خان میں سیکورٹی فورسز پر حملے، دو اہلکار ہلاک، تین زخمی

اسلام آباد (ش ح ط) صوبہ خیبر پختونخوا کے ضلع ٹانک میں دہشت گردوں کے حملے میں سیکورٹی فورسز کا ایک ہلاک جبکہ دوسرا زخمی ہوگیا۔

تفصیلات کے مطابق تھانہ ایس ایم اے کے حدود میں دہشت گردوں نے سیکیورٹی فورسز پر فائرنگ کر دی، پولیس کے مطابق فائرنگ کے نتیجے میں سیون سندھ رجمنٹ سے تعلق رکھنے والے نائیک غلام علی موقع پر ہی دم توڑ گئے جبکہ نائیک بلال شاہ زخمی ہوگئے۔

پولیس کے مطابق سیکورٹی فورسز نے علاقے کو گھیرے میں لے کر آپریشن شروع کر دیا ہے۔

ادھر ڈیرہ اسماعیل خان میں بھی سیکورٹی فورسز کی کانوائے پر دہشت گردوں نے حملے کی اطلاعات موصول ہوئی ہیں۔

اطلاعات کے مطابق ڈیرہ اسماعیل خان کے علاقے ہتھالہ میں سیکورٹی فورسز اور دہشت گردوں کے درمیان فائرنگ کا تبادلہ جاری ہے اور آخری اطلاعات کے مطابق فائرنگ سے ایک اہلکار ہلاک، اور دو زخمی ہوگئے۔

تیسرے واقعہ میں ڈیرہ اسماعیل خان کی تحصیل درابن کے نواحی گاؤں زڑکنی میں نامعلوم مقام سے داغا گیا ماٹر گولہ ایک مکان پر گرنے سے دو بچے ہلاک اور تین عورتیں زخمی ہوگئیں۔