ٹانک: دہشت گردوں کا پولیس وین پر حملہ، ایس ایچ او سمیت 6 اہلکار زخمی، حملہ آور ہلاک

ڈی آئی خان (توقیر حسین زیدی) خیبر پختونخوا کے ضلع ٹانک میں پولیس وین پر دشت گردوں کا ہینڈ گرنیڈ سے حملہ۔ ایس ایچ او سمیت 6 پولیس اہلکار، ایک راہگیر زخمی جبکہ ایک حملہ آور مارا گیا

تفصیلات کے مطابق ٹانک میں تھانہ گومل کی پولیس وین معمول کی گشت پر تھی کہ دشت گردوں نے ہینڈ گرنیڈ سے حملہ کر دیا جس سے ایس ایچ او عنایت سمیت 6 پولیس اہلکار اور ایک راہگیر زخمی ہو گیا جبکہ پولیس کی جوابی کاروائی میں ایک حملہ آور بھی مارا گیا۔ زخمی ہونے والے پولیس اہلکاروں میں ایس ایچ او عنایت اللہ، سب انسپکٹر نور اسلم، حوالدار شفیق، کانسٹیبل سعید الرحمن، کانسٹیبل کوثر، کانسٹیبل عمر خطاب اور کانسٹیبل عامر نوید شامل ہیں۔ زخمیوں کو فوری طور پر ڈسٹرکٹ ہیڈ کوارٹر ہسپتال ٹانک منتقل کیا جارہا ہے۔

پولیس اور سیکیورٹی فورسز کی بھاری نفری موقع پر پہنچ گئی۔ ذرائع کے مطابق پولیس نے علاقہ کو گھیرے میں لیکر سرچ آپریشن شروع کردیا ہے۔