ٹانک سے اغوا ہونے والے پولیس اور ایف سی اہلکار کی ذبح شدہ لاشیں برآمد

اسلام آباد (ش ح ط) صوبہ خیبرپختونخوا کے ضلع ٹانک میں اغوا ہونے والے ایف سی اور پولیس اہلکار کی ذبح شدہ لاشیں برآمد کی گئیں۔

پولیس کے مطابق تھانہ صدر کی حدود کڑی حیدر میں گولیوں سے چھلنی 2 افراد کی لاشیں برآمد ہوئی ہیں، جن کی شناخت حبیب اللہ اور انعام اللہ کے نام سے ہوئی ہے، انعام اللہ ایف سی اہلکار تھا جوکہ چھٹی پر گھر آیا تھا جبکہ نصیب اللہ پولیس اہلکار تھا۔

ڈی پی او کے مطابق دونوں افراد کو گذشتہ روز ٹانک کے علاقے علی خیل گاوں سے ٹانک جاتے ہوئے اغوا کیا گیا تھا۔ لاشوں کو ٹانک ڈسٹرکٹ ہسپتال لایا گیا ہے جہاں پوسٹمارٹم کے بعد انہیں آبائی گاوں روانہ کیا جائے گا۔

ادھر ڈیلی اردو کو مقامی لوگوں نے بتایا ہے کہ ٹانک میں کڑی حیدر سے دونوں اہلکاروں کی ذبح شدہ لاشیں برآمد کی گئیں۔

مقامی لوگوں نے ڈیلی اردو کو مزید بتایا کہ دونوں اہلکاروں کے سر تن سے جدا کئے گئے تھے۔ ڈیلی اردو کو موصول ہونے والے مبینہ تصویر میں بھی دونوں اہلکاروں کے سر تن سے جدا تھے۔