ٹانک میں سیکورٹی فورسز کے ساتھ جھڑپ میں تحریک طالبان پاکستان کے 4 مبینہ شدت پسند ہلاک

ٹانک (نمائندہ ڈیلی اردو) سکیورٹی فورسز کی خیبرپختونخوا کے ضلع ٹانک میں کارروائی کرتے ہوئے کالعدم تنظیم تحریک طالبان پاکستان گنڈا پور گروپ کے 4 مبینہ شدت پسندوں کو ہلاک کر دیا۔

سکیورٹی فورسز ٹانک میں رات گئے سرچ آپریشن میں مصروف تھیں کہ رنوال کے مقام پر شدت پسندوں سے آمنا سامنا ہوگیا۔ شدت پسند 7 موٹر سائیکلوں پر سوار تھے۔ جن کی تعداد 21 کے قریب تھی۔ آپریشن کے دوران فائرنگ کا تبادلہ ہوا، جس میں 4 شدت پسند ہلاک ہوگئے۔ اس دوران دو راہگیر بھی زخمی ہوئے۔

https://twitter.com/ShabbirTuri/status/1577167789265408000?t=8Q2d-h3_oJ-nFNUf0q-pVg&s=19

ڈی پی او ٹانک کے مطابق شدت پسندوں کے قبضے سے خود کار ہتھیار اور 7 موٹر سائیکلیں برآمد ہوئیں، جب کہ دہشت گردوں کے دیگر ساتھی فرار ہوگئے، جس کے بعد سکیورٹی فورسز کا علاقہ میں سرچ آپریشن تاحال جاری ہے۔ ہلاک ہونے والے ایک شدت پسند کی شناخت محمد زبیر کے نام سے ہوئی، مبینہ مقابلے کے دوران شدت پسند سات موٹر سائیکل چھوڑ کر فرار ہو گئے، ہلاک ہونے والے شدت پسندوں سے 3 عدد کلاشنکوف، ہینڈ گرنیڈ اور ایک عدد راکٹ لانچر برآمد ہوا ہے۔

اس سے قبل، گزشتہ ہفتے ضلع لکی مروت میں سیکیورٹی فورسز نے فائرنگ کے تبادلے میں دو شدت پسندوں کو ہلاک کردیا تھا، مارے گئے شدت پسند سیکورٹی فورسز کے خلاف دہشت گردی کی کارروائیوں میں ملوث تھے۔