ٹانک: پولیس اہلکار اغواء، کارروائی میں دو شدت پسند ہلاک، دو گرفتار

ٹانک (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ٹانک کے تھانہ گومل کی حدود سے پولیس اہلکار حوالدار عبدالحلیم اغواء کر لیا گیا۔ 

پولیس ذرائع کے مطابق اہلکار چھٹی پر گھر جا رہا تھا کہ گاؤں شیخ سلطان میں واقع مڈل سکول کے قریب شدت پسندوں نے اسے اغواء کر لیا۔

پولیس اور قانون نافذ کرنے والے اداروں نے مغوی کی بازیابی کے لیے سیرچ آپریشن شروع کر دیا ہے۔

ذرائع کے مطابق ٹانک کے گاؤں نصران میں پولیس اور سکیورٹی فورسز نے اغواء گروپ کے خلاف کارروائی کی، جس کے دوران کالعدم تنظیم کے کمانڈر کاشف اور سہیل ہلاک ہو گئے جبکہ دو دیگر شدت پسند زخمی حالت میں گرفتار کر لیے گئے۔

پولیس کے مطابق یہ گروپ گزشتہ روز بھی پولیس کانسٹیبل سجاد کو ہلاک کرنے میں ملوث تھا۔